Sakyanan gidili sa rota sa prosesyon

CEBU, Philippines - Did-an ang bisan unsa nga mga sakyanan sa pagsubay sa rota sa prosesyon sa imahen sa Balaang Bata nga si Señor Santo Niño karong Sabado sa hapon.

Gipahibawo ni Konsehal Dave Tumulak, deputy mayor for police matters, nga sirad-an ang dalan duha o tulo ka oras sa dili pa magsugod ang prosesyon.

Tumong niini aron maseguro ang kaluwasan sa liboan ka deboto sa Balaang Bata nga mangapil sa prosesyon.

Ang prosesyon magsugod sa Basilica Minore del Santo Niño subay sa Osmeña Boulevard paingon sa Fuente Osmeña Circle, mopadagayday sa General Maxilon Avenue lahos sa may Carreta Cemetery ug liko sa New Imus Road dayon sa M.J Cuenco Avenue ug balik sa Basilica.

Magbutang og metal, concrete barriers o truck ang siyudad sa mga intersections aron walay mga sakyanan nga makalusot ug makasulod kay dili buot sa konsehal nga duna unyay maangol.

Giawhag ni Tumulak ang mga establisemento nga sayo i-deliver ang ilang mga produkto aron dili maabtan sa pagsira sa kadalanan.

Nasayran nga sa procession route, 46 ka eskina ang sirad-an ug sa Sinulog Grand Parade, 30 ka eskina ang gipaabot nga sirad-an. Hinoon ang mga emergency vehicles sama sa kapolisan, kabomberuhan, kasundaluhan ug ubang ahensiya sa gobiyerno nga may kalambigitan sa Sinulog mahimong makasulod ilabi na kung dunay tubagon nga alarma ug emerhensiya. (BANAT NEWS)