Sinulog sa Barangay ipadayon sunod tuig

CEBU, Philippines - Daku ang posibilidad nga ipadayon gihapon sunod tuig ang Sinulog sa Barangay human hugot gyud sa iyang baruganan si Cebu City Mayor Tomas Osmeña nga dili siya gustong adunay mga tunghaan nga mosalmot sa maong kalihukan kay makaapekto kini sa pag-eskwela sa mga tinun-an.

Gihimug-atan ni Mayor Osmeña nga dili siya gusto nga moapil ang mga eskwelahan sa Sinulog kay matud pa ang mga tunghaan abusado.

 Giingong ang mga tinun-an magpraktis og sayaw panahon sa tingklase mao nga makaapektar na hinoon kini sa ilang pagtungha.

Gawas niini giingong pugson sa tunghaan ang mga ginikanan sa pag-amot alang niini butang nga wala makauyon ang mayor.

Sa habig sa probinsiya, giklaro ni Osmeña nga respetuhan niya nga muapil sa Sinulog sa Kabataan sa Lalawigan sanglit wala na man kini labot sa iyang hurisdiksyon.Sa laing bahin, dili pa sigurado kun mahibalik ba ang Miss Cebu sunod tuig ilabi na nga bukas ang mayor sa ideya nga mas i-promote ang Sinulog Festival Queen.

Nagkanayon si Osmeña nga ang pribadong sector mahimong mopahigayon og Miss Cebu apan kini mitataw nga dili mogasto ang kagamhanan sa siyudad alang niini. Kahinumduman nga una na niyang gihulagway nga ang maong indigay sa kaanyag nahimong ‘elitist’ o dili kini alang sa tanang katawhan ug alang kini sa mga tawo nga adunay mga koneksiyon.

Kahinumduman nga ang Miss Cebu usa sa mga kalihukan sa Sinulog matag tuig nga atngan sab sa kadaghanan sanglit dinhi makita ang mga indigay dili lang sa kagwapa apan lakip na sa kautukan sa matag kandidata nga miapil niini nga gikan pa sa nagkalain-laing lugar sa Sugbo. (BANAT NEWS)