Kita sa ihawan sa Talisay nidoble

CEBU, Philippines - Niabot sa P2 milyones ang natigum sa ihawan sa Dakbayan sa Talisay sulod lang sa niaging buwan sa Disyembre.

Kini maoy gipahibawo ni Konsehal Manuel Cabriana, kinsa chairman sa committee on market and slaughterhouse.

Nagkanayon si Cabriana nga sukad nga gisira ang ihawan sa Siyudad sa Sugbo nagkadaghan na sab nga mga mangihaway ang niabot sa ihawan sa Talisay hinungdan nga nisaka ang ilang kita.

Apan lahi gyud ang ilang naobserbahan nga pagsaka sa income sa buwan sa Disyembre ikumpara sa ubang mga buwan dihang nisugod na sila sa pagdawat sa mga negosyante og karne nga diha magpa-ihaw sa ilang ihawan.

Niadtong Septiyembre nagpaihaw ang mga negosyante sa ilang hayopan sa Talisay diin nisaka ang ilang income nga moabot sa P1 milyon apan sa pag-abot sa Disyembre diin grabe ang demand sa karne nidoble ang income ug niabot sa P2 milyones.

Sa wala pa ang negosyante sa Siyudad sa Sugbo nipaihaw sa ilang mananap sa Talisay aduna lay income nga P800 mil ang siyudad matag buwan.

Tungod niini, si Cabriana ang nakahuna-huna nga angay nga ilang baslan ang ilang mga kliyente sa paghimo og mga proyekto sa ihawan.

Asoy niya nga bati na gyud ang agianan sa ihawan hinungdan nga iya kining ihangyo ni Mayor Eduardo Gullas nga tagaan og budget aron kini maatiman.

Gawas pa niana, ila gyung paningkamutan nga magpermanente ang ilang pagka “Double A” accredited aron dili na gyud mahasol ang mga negosyante sa pagpangita og laing ihawan. (BANAT NEWS)