South terminal mabalhin gyud sa SRP

CEBU, Philippines - Positibo ang pangulo sa Cebu South Bus Terminal, Joey Herrera, sa plano nga ibalhin sa South Road Properties ang terminal.

Matud ni Herrera nga gisugo siya ni Gobernador Hilario Davide III nga tan-awon ang luna sa SRP nga kaniadto maoy usa na sa gikonsiderar nga ibaylo sa Dakbayan sa Sugbo sa mga luna nga ubos sa 93-1 sa probinsiya.

Sa iyang pagsusi sa Cebu City Hall, si Herrera nibutyag nga adunay pending application sa terminal accreditation committee nga magbutang og private terminal dapit sa SRP sa habig sa UC-Mambaling diin nahimutang ang farmers market.

Matud ni Herrera nga kung madayon kini nga terminal, mo-complement ra usab kini kung ugaling madayon ang plano sa Kapitolyo sa pagbalhin sa CSBT sa SRP.

Kini gumikan kay ang kadtong mopauli sa probinsya mamahimo na nga mosakay og jeep ug taxi ug mohunong sa pribadong terminal dayon motabok sa pagsakay sa bus sa CSBT.

Si Herrera nagkanayon nga angay na usab nga ibalhin ang CSBT sanglit huot na ang kasamtangang nahimutangan niini sa may N. Bacalso Avenue nga may gilapdon nga kapin sa usa ka ektarya nga luna itandi sa kapin 2.5 ka ektarya sa SRP.

“There’s a need because of the anticipation nga anha moagi ang Bus Rapid Transit so magamay na ang agianan,” dugang ni Herrera. (BANAT NEWS)