Kalipay ug kaluoy palabihon karong Pasko
CEBU, Philippines - Pagpaambit sa kalipay ug kaluoy, kinabuhi inay kamatayon ug pagpanalipod sa kultura ug dili kawalay respeto sa balaod ang angay nga ipatigbabaw ning panahon sa Pasko.
Kini ang tipik sa mensahe ni Cebu Archbishop Jose Palma sa Archdiocese of Cebu ning Panahon sa Pasko.
Matud pa ni Palma, base sa pamahayag ni Pope Emeritus Benedict XVI ang kalipay maoy tinuod nga gasa ning Panahon sa Pasko ug dili ang mahalon nga regalo nga gigastohan og oras ug salapi.
Sumala pa ni Palma, ang tawo mahimong makigsandurot sa simple nga kalipay pinaagi sa pagkatawa, kamaayo, gamay nga hinabang ug pagpasaylo kay matud niya mobalik kining tanan sa nakahatag niini sa uban.
Dugang pa ni Palma, malaumon siya ug maampoon nga ang kalipay sa Pasko mapaambit diha sulod sa pamilya ug gikan sa pamilya ngadto na sa komunidad.
"There is joy in Christmas because Jesus gave us life in abundance. Let us share this joy by protecting and promoting a culture, not of lawlessness, but mercy; not of death, but life," matud pang Palma.
Samtang si Gob. Hilario Davide III nanghinaot nga ang tanan malipayong magsaulog uban sa ilang pamilya ug kalimtan ang tanang mga nanglabay na nga bati sa kinabuhi.
“Malipayong pasko sa tanan, hinaot nga magkahiusa kita, hinaot nga magmalipayon kita karong Pasko, kamong mga ka-igsuonan uban sa inyong tagsa-tagsa ka pamilya ug magpasalamat kita sa Ginoo sa tanang grasya nga nadawat nato karong tuiga ug kalimtan ang mga nanglabay nga dili maayo,” matud ni Davide sa mubo niyang mensahe alang sa katawhan. (BANAT NEWS)
- Latest
