Davide, 15 opisyales gikiha tungod sa heavy equipment
CEBU, Philippines - Gipasakaan og kaso ang 15 ka opisyal sa Kapitolyo, tulo ka suppliers ug anti-graft crusader sa buhatan sa Ombudsman-Visayas may labot sa bidding sa P252.7 milyones nga heavy equipment.
Gikiha mao sila si Gobernador Hilario Davide III, Bise Gob. Agnes Magpale, Bokal Christopher Baricuatro, Jerome Librando, Yolanda Daan, Jose Mari Salvador, Jude Thaddeus Sybico, Miguel Antonio Magpale, Celestino Martinez III ug Earl Tidy Oyas.
Si Provincial Administrator Mark Tolentino, pangulo sa Bids and Awards Committee, ug mga sakop nga sila si Atty. Donato Villa Jr., General Services Office head Jone Siegfred Sepe, Provincial Engineer Hector Jamora ug Budget Officer Danilo Rodas apil usab sa gikiha.
Samtang gikiha og apil ang anti-graft crusader nga si Crisologo Saavedra ug ang mga suppliers nga mao ang ConEquip Philippines, RDAK Transport Equipment, Inc. ug D’Limitless Vehicle Corp.
Ang reklamante nagpaila lang nga promoter sa gimugna ni Presidente Rodrigo Duterte nga Office for Participatory Governance and Strategic Action and Response ubos ni Cabinet Secretary Leoncio Evasco Jr. Human sa bidding niadtong Nobiyembre 25, ang BAC nirekomendar sa pag-award ngadto sa joint venture sa ConEquip/RDAK human nakabutang og labing ubos nga presyo balor og P227.4 milyones.
Apan ang reklamante nipasangil nga wala gyud susiha sa BAC ang mga dokumento diin ang RDAK ug D’Limitless Vehicles gipanag-iya lang sa samang mga tawo.
Ang Notice of Award nasuta usab nga gipirmahan na daan ni Davide niadtong Oktubre 27, 2015, kapin sa usa ka tuig na sa wala pa ang bidding.
Laing kalapasan nga gitumbok sa reklamante mao nga nagpahigayon na og bidding bisan wala pay pundo sanglit ang Kapitolyo manghuwam pa sa Land Bank of the Philippines.
Si Davide sa iyang bahin miingon nga paaboton lang niya ang abiso sa Office of the Ombudsman kabahin sa kaso.
“If there’s a complaint, I’ll just wait nga patubagon ta sa Ombudsman. Unsa man ilang basis? Anonymous? Nganong di man sila magpaila?” matud ni Davide.
Si Davide nagkanayon nga bisan pamasko na unta sa Kapitolyo alang sa mga lungsod ang pagpalit og ekipo apan aduna gihapon mikiha.
“That’s all I can say. What a Christmas no? Naa na raba tay Merry Christmas para matabangan ang mga kalungsoran nga mao nay ilang mga needs gyud, nya ikiha pa ta, ikiha pa ang BAC, ikiha pa ang vice governor? “ matud ni Davide.
Siya mihimakak nga mipirma siya og notice to award sa wala pa ang bidding sa heavy equipment
“Ay impossible sad gyud, ngano gud tawon nauna sa bidding? You check sa BAC,” matud ni Davide. (BANAT NEWS)
- Latest
