Budget sa feeding program sa DSWD ug DepEd gidugangan

CEBU, Philippines - Gidugangan sa Senado og P1 bilyones ang budget alang sa feeding program sa mga bata sa Department of Social Welfare and Development (DSWD) diin nikabat na ang kinatibuk-ang budget sa maong departamento ngadto sa P4.427 bilyones.

Tungod niini ang DSWD modalit og lugaw matag adlaw ngadto sa 1.74 milyones ka mga bata nga nagpangidaron og duha ngadto sa upat ka tuig sulod sa 120 ka adlaw sunod tuig.

Sa taho sa Philstar.Com bisan og siya maoy nihimo sa maong amendment, si Senate Minority Leader Ralph Recto nisegunda sa hiniusang kawsa sa mga senador nga pausbawan ang gahin alang sa anti-child malnutrition activities.

“During the floor debates, the push for a higher budget was incessant. Sen. Grace Poe was relentless in her questioning. And the chair, Sen. Loren Legarda, was receptive to the proposals made,” matud ni Recto kinsa unang nikwestiyon sa gamay nga alokasyon sa nutrition services ilabi na ang feeding sa mga bata bisan og wala pa gisumiter ang 2017 national budget sa kongreso.

Base sa pag-amendar sa maong balaod ang P13 per meal nga gi-served sa mga tunghaan ug daycares himoon kini nga P20.

Apan ang planong pag-amendar sa alokasyon sa “school feeding” program sa Department of Education wala sagopa kay mismo ang DepEd adunay “fund absorption” nga isyu nga posibleng dili magamit ang dugang nga pundo.

Gipanalipdan ni Recto ang paghatag og P1 Billion nga iyang gihulagway nga gamay ra kini kun itandi sa gibana-banang P328 Bilyones nga annual economic losses gumikan sa malnutrition sa kabataan.

Ang feeding program sa gobiyerno alang sa mga bata nagsubay sa duha ka paagi; Ang DSWD maoy modumala sa mga underweight nga nag-edad og duha ngadto sa upat ka tuig nga anaa sa daycare o sa komunidad samtang ang DepEd maoy gisangonan sa mga nagtungha gikan sa nagpangidaron og 5 ngadto sa 11 anyos nga anaa sa Kindergarten hangtud Grade 6.

Sa ilang pagtambong sa Senado, giangkon sa mga opisyal sa DepEd ug DSWD nga ang kasamtangan nilang pundo sa feeding programs dili gyud kaigo aron mabatukan ang malnutrition.

Subay niini gipangayoan ni Recto og kasiguroan ang DepEd ug DSWD officials nga ilang gamiton sa sakto ang mao nilang budget. (BANAT NEWS)