P6.7M nga water system sa Badian gisugdan na

CEBU, Philippines - Gisugdan na sa pagpatukod sa kagamhanan sa probinsiya ang P6.7 milyones nga level II water work system sa Lungsod sa Badian.

Upat ka barangay nga gilangkuban sa Matutinao, Malabago, Hinablan ug Balhaan ang makabenepisyo sa proyekto.

Si Gobernador Hilario Davide III nagkanayon nga kung makompleto na ang pagtaud sa mga tubo, gibana-banang 100 cubic meters nga tubig nga mainom matag adlaw ang masuplay ngadto sa matag barangay.

Ang Lungsod sa Badian nahimutang kini sa habagatang bahin sa probinsiya ug naila sa pagkaabunda sa tubig tungod sa Kawasan Falls.

Apan ang ubang barangay duol sa falls ang nakasinati og kakuwang sa tubig nga mainom tungod kay walay mga tubo diha sa ilang     lugar.

Sa laing bahin, niluwat og executive order si Davide sa pag-umol og Alegria-Badian River Tourism Committee nga motabang sa pagmugna sa pagpatuman sa mga polisiya alang sa luwas ug sustainable nga eco-tourism.

Matud ni Davide nga kini ang sulbad sa bangi sa duha ka lungsod.

Partikular nga himoon sa komitiba mao ang pagtabang sa pag -umol sa mga stratehiya alang sa sustainable tourism lakip na ang pag-edukar sa mga bisita, pagdumala, healthy and safety, water resource conservation, infrastructure development ug ingon man ang pag-monitor ug evaluation.

Ang komitiba langkuban kini sa nagkadaiyang hepe sa departamento sa Kapitolyo sama sa provincial tourism officer nga maoy mangulo niini ug ang mga sakop mao ang provincial disaster risk reduction and management officer, provincial environment officer, social welfare officer ug health officer. (BANAT NEWS)