Konsehal protektor sa drugas gi-monitor
CEBU, Philippines - Nanawagan si Kapitan Perla Cabanes sa Tanke, Dakbayan sa Talisay sa kapolisan nga nganlan na ang opisyal sa barangay nga giingon protektor sa ginadiling drugas.
Si Cabanes nauwaw na lakip na ang iyang pamilya dihang nigawas ang maong balita.
Matud niya nga unta nganlan na ni Supt. Emerson Dante, hepe sa kapolisan sa dakbayan, ang maong opisyal aron maklaro ang tanan.
Apan si Dante sa iyang bahin nagkanayon nga dili angay nga mabalaka si Cabanes tungod kay dili man siya ang gipasabot.
Iyang giklaro nga adunay konsehal nga niduol kaniya aron paghangyo nga buhian ang tawo nga ilang nasikop kinsa nalambigit sa ginadiling drugas.
Matud niya nga nagka-estorya na sila ni Cabanes ug iya kining gitambagan nga susihon ang iyang mga konsehal kun kinsa ang iyang gipasabot. Si Dante nitataw nga gi-monitor na niya ang maong mga konsehal.
Kung mapamatud-an nga aduna gyuy partisipasyon sa ilegal nga drugas, ila kining ikonsiderar nga high value target tungod kay mga opisyal man sila sa gobyerno.
Si Dante niingon nga dili gyud masumpo ang ginadiling drugas kun padayon ang mga opisyal nga magprotektar sa mga ilegalista. (BANAT NEWS)
- Latest
