Sugbo apil sa dengue vaccination
CEBU, Philippines - Nunot sa problema sa dengue, ang mga estudyante sa publikong eskwelahan sa probinsiya nga nagpanuigon og 9-anyos pataas ang gikatakdang bakunahan og dengue vaccine.
Si Dr. Rene Catan, hepe sa Provincial Health Office (PHO), nagkanayon nga human sa massive clean-up, duna unya sila’y ipahigayong massive vaccination ngadto sa maong mga estudyante.
Matud ni Catan nga ang probinsiya usa sa napili nga mahatagan og dengue vaccine ug padayon ang ilang koordinasyon karon tali sa Department of Health (DOH) kabahin niini.
Gilauman niya nga karong buwan sa Disyembre maabot na sa probinsiya ang mga dengue vaccines.
Matud ni Catan nga padayon ang ilang pag-monitor sa dengue ug padayon usab ang ilang pagpahigayon og misting.
Nasayran nga ang probinsiya nideklara og state of calamity tungod sa pagsaka sa kaso sa dengue karong tuiga diin sukad Enero 1 hangtud Nobiyembre 12, niabot na sa 8,969 ug kapin sa 50 ang nangamatay.
Si Catan nagkanayon nga napugngan ang pagsaka pa sa kaso tungod sa hugtanong kampaniya sa probinsiya batok sa dengue.
Ang PHO nipasiugda og massive clean-up sa kalungsuran aron masumpo ang sakit nga makamatay nga dala sa lamok. (BANAT NEWS)
- Latest
