Poster bahin human trafficking ipabutang sa mga hotel

CEBU, Philippines - Gihangop ni Mayor Tomas Osmeña ang bag-ong ordinansa nga naghimo sa Cebu City Inter-Agency Council Against Trafficking (CCIACAT).

Naglakip sa maong ordinansa sa pag-awhag sa mga tag-iya og hotels nga magpaskin sa atubangan sa ilang mga establisamento mahitungod sa human trafficking.

Ang maong ordinansa adunay lain-laing silot; sa unang paglapas, pahimangnoan sila sa CCIACAT aron magmatngon. Ikaduha, ang CCIACAT personnel mobisita sa establisamento nga nakalapas sa unang higayon ug kun wala kini motuman sa pahimangno, pamultahon kini og P5 mil matag bisita.

Hatagan ang establisemente og lima ka adlaw sa pagtuman ug kun pakyas gihapon human sa ikatulong pagbisita magpadayon ang evaluation sa penalty ug rekomendasyon sa pagpasira sa establisemento ngadto sa Office of the Mayor.

Matud ni Konsehal Sisinio Andales, niuyon ang mayor sa ordinansa nga iyang gihimo.

Ang siyudad mohatag og duha ka buwan aron sa pagtuman sa maong ordinansa ug giawhag ang tanang establisamento nga magbutang og poster o kaha pahibalo batok sa human trafficking nga may gitas-on nga 11 by 17 pulgadas ug font size nga dili molapas sa 48. (BANAT NEWS)