Wala kita masayod sa panahon o takna...

Nobiyembre 27, 2016: Unang Domingo sa Adbiyento

Mga pagbasa: Is. 2:1-5/Sal. 122/R

om. 13;11-14/Mt. 24, 37-44

Kini ang pahimangno sa atong Ginoo kanato ug ang panahon sa Adbiyento panahon man sa pagpangandam sa iyang ikaduhang pag-anhi ingon man ang paghandum sa iyang unang pag-anhi. Kini man ang literal nga pagsabot kun maghisgot kita og adbiyento. Ang adbiyento gikan sa linatin nga adventus nga nagpasabot literally og coming. Daghan nang mga baligya nga mga Christmas decors ingon man madungog na nato ang paskohanong huni apan dili unta nato hikalimtan nga ang Pasko dili lang mahitungod sa mga parties ang Pasko panahon usab sa pamalandong. Mao nga kun madayon pananglit ang pag-ban sa mga pabuto nan, ang Pasko mamahimong maalegre gihapon pinaagi sa mga tarutot ug uban pang pagsaba-saba nga dili na kinahanglang mogamit pa og pabuto. Ang adbiyento sinugdanan sa atong espirituhanong panaw sa pagpakigsuod sa Diosnong Bata ug unta atong hinumdoman nga wala lang siya magpabiling bata. Nidako siya ug nahamtong aron kita tudloan ug pahimatngonan kun unsay angay natong himuon.