2 barangay kapitan gireklamong nanion

CEBU, Philippines - Duha ka mga barangay kapitan sa Dakbayan sa Sugbo ug sa Dakbayan sa Mandaue ang gipasanginlang nanion og armas kagahapon.

Apan sa Cebu City, nagtingkagol karon sa Sawang Calero Police Station si Romeo Lopez, 56, nagpuyo sa Garfield Street sa maong barangay human giingong nanion og pugakhang kang Kapitan Antonio Caruzca sa Brgy. Pahina San Nicolas kagahapon sa hapon diha sa may Garfield Street sa maong barangay.

Si Lopez nga nakahinabi sa Banat News napungot ug naglagot lang gayud siya tungod sa kadugay nang gitrabaho ang dalan sa ilang lugar apan hangtod karon wala pa gayud kini maayo.

Sumala pa ni Lopez, susama ug gibinuangan lang ang katawhan sa mga trabahante sa gobiyerno kay dugay na kaayo ang maong road project apan wala pa gayud nahuman hinungdan nahurot na iyang pasensiya ug nagdala-dala siya og pugakhang dili mamusil kung dili aron sa pagpanghadlok.

Apan matud pa niya si barangay kapitan  Caruzca kinsa didto sa veranda sa balay niini iyang nakit-ang gitionan siya niini og armas.

Si Lopez, nagmahay sa iyang nahimo ug nangayo og pasaylo sa kapitan tungod kay nadala lang siya sa iyang kalagot.

Si Caruzca sa iyang bahin nga nahinabi sa Banat News nitug-an nga natulog siya sa ilang balay sa dihang nakadungog siya og syagit sa mga tawo hinungdan nga iyahang gigawas. Dugang pa ni Caruzca, inay mopatoo sa iyang pagbadlong siya na hinoon ang gitionan hinungdan nga nisulod siya ug nikuha sa iyang armas apan gipanggukod ni Lopez ang mga tawo.

Sumala pa ni Caruzca, diha sa iyang veranda iyang gitionan si Lopez ug giawhag nga ibutang niini ang iyang pugakhang ug didto dali kini nasikop sa mga tanod ug gi-turnover ngadto sa mga sakop sa kapulisan sa Police Station 6. Si Police Officer 3 Eric Arnido, desk officer nitug-an nga nasikop nila si Lopez human adunay nanawag sa ilaha ug nagpahibalo nga adunay armado nga tawo.

Samtang didto sa Brgy. Cubacub sa Mandaue City, gireklamo usab ang ilang brgy kapitan nga si Almario Bihag,40, sa duha ka mga babaye kay matud pa “nanion” kini og armas atol sa pagpahigayon nila og eleksyon sa ilang kahugpongan diha sa Cubacub Gym sa may Purok 3 sa maong barangay. Ang nipadangat sa ilang reklamo mao sila si Rolita Balane, 59, taga Brgy. Paknaan, ug Winnie Sicad, 38, taga Brgy. Cubacub.

Matud pa ni Senior Police Officer 3 Danilo Baritta, Desk Officer sa Station 6 sa Mandaue City Police Station, base sa ilang initial nga imbestigasyon nagpahigayon og Barangay Election on Multi-Sectoral Governance Coalition ang mga reklamante sa dihang kalit nga niabot ang kapitan ug gikatahong gipangtionan sila niini og kalibre 45 pistola.

Matud pa ni Baritta nasuko ang kapitan sa pagpahigayon sa maong eleksyon, hasta si Sicad gitionan kay nagkuha kini og video sa kapitan.

Dugang pa ni Barrita nga atol sa maong insidente ang tanod nga si Nelson Biga maoy midis-arma sa kapitan ug pag-abot sa mga polis nakalakaw na ang kapitan. Si Barrita miingon nga ilang paabuton nga mopasaka og kaso ang mga reklamante.

Suway nga gikuhaan og pamahayag sa Banat News ang kapitan pinaagi sa pagtawag sa buhatan niini apan walay mga tawo ug bugtong ang Emergency Response Team sa Cubacub nga si Glenn Goc-ong ang nitubag ug nibutyag nga walay opisina tungod kay adlaw nga Sabado. (BANAT NEWS)