Mga tanod gibansay bahin sa VAWC

CEBU, Philippines - Nipahigayon og legal training ang Provincial Legal Office ngadto sa 380 ka mga opisyal sa barangay lakip na ang mga tanod sa lungsod sa Minglanilla niadtong milabay’ng Martes.

Si Provincial Legal Officer, Orvi Ortega nibutyag nga ang mga hisgutanan sa maong seminar gilangkuban sa balaod kabahin sa search and seizure, warrantless arrest ug Violation Against Women and Children (VAWC) lakip na ang mediation techniques.

Ang maong kalihukan subay sa Barangay Legal Outreach Program (BLOP) sa probinsiya diin tumong niini mao ang pag-usbaw sa kamauhan sa mga opisyal sa barangay ug tanod.

Ang hepe sa Police Regional Crime Laboratory Office-7, PSupt. Romer Daguno maoy nipakita kabahin sa pagpreserba sa mga ebidensiya ug basic crime scene investigation and protection. Adunay gipahigayong dramatized crime scene diin ang mga gi-seminar maoy gipahimo og actual investigation ug evidence preservation.

Nunot niini, gikataho nga ang kaso sa pagpangabuso sa kababayen-an sa probinsiya ug dakbayan sa Sugbo misaka.

Sa tuig 2014, adunay 568 ka kaso sa physical injuries ug 47 ka psychological abuse sa dakbayan samtang sa tuig 2015 ang physical injury niabot ngadto sa 846 ug 125 ang psychological abuse. Sa probinsiya, giingong kasagaran nga natala nga mga kaso sa Women and Children Protection Council sa Cebu Provincial Police Office gikan sa dakbayan sa Talisay ug nagsunod ang dakbayan sa Bogo. (BANAT NEWS)