Protektor nga opisyal sa Tangke nganlan sa hepe

CEBU, Philippines - Andam hinganlan sa hepe sa kapolisan sa Dakbayan sa Talisay ang opisyal sa Barangay Tangke nga giingong protector sa ginadiling drugas kung ipatawag siya ni Mayor Eduardo Gullas bahin sa taho.

Matud ni Supt. Emerson Dante nga mahibaw-an ra unya ang pangan sa maong opisyal kung ipatawag na siya sa mayor.

Sayo niini si Dante nagkanayon nga dili masulbad ang problema sa drugas sa Tangke tungod kay adunay opisyal nga nagprotektar niini hinungdan sa pagkisi-kisi ni Kapitan Perla Cabanes.

Matud ni Gullas nga dili siya makatugot nga tabon-tabunan ang ilegal nga drugas.

Dugang ni Gullas nga wala gyud siya kaila ni Dante apan iyang nakita nga desente ug tarong kini nga tawo isip hepe sa kapolisan sa dakbayan.

Samtang duha ka lalaki nga nagdala og armas ug laing usa nga naghupot og ginadiling drugas ang nasikop sa kapolisan sa Dakbayan sa Talisay sa managlahing barangay niadtong Martes sa gabii.

Pasado alas 10 sa gabii nagpakitabang sa kapolisan si Brian Espinosa, 28, ulitawo nga taga Uldog St., San Isidro kalabot sa iyang gikakontra nga adunay armas.

Dali nga niresponde ang mga sakop sa Special Weapons and Tactics (SWAT) uban sa biktima.

Ilang nakit-an ang suspek nga si Mark Saylon, 26, minyo nga lumad nga taga Balirong, Dakbayan sa Naga ug gisikop gumikan kay armado og pugakhang nga may usa ka bala sa shotgun.

Alas 3 sa kaadlawon kagahapon, laing tawag ang nadawat sa kapolisan labot sa armadong tawo sa sitio Rattan, Tangke diin nasikop si John Beboy Abaquita, 25, minyo nga taga San Pio Subdivision, Dumlog.

Nakuha gikan kaniya ang .357 revolver nga adunay duha ka bala.

Nasikop sab si Karl Dennes Bitayo, 27, ulitawo, kinsa nakuhaan og walo ka gagmay nga pakete sa shabu. (BANAT NEWS)