3 ka ‘salisi’ nadakpan

CEBU, Philippines - Tulo ka mga babaye gikan sa Manila ang nadakpan ug gibalhog karon sa selda sa Mabolo Police Station human sila nasakpan nga mikuha sa usa ka pitaka sa usa ka babaye  nga ilaha na diay gibiktima sa miaging semana sulod sa mall sa Brgy. Banilad sa Dakbayan sa Sugbo ug gigamit pa ang ATM ug credit cards niini ug nakakuha sa dakong kantidad sa kuwarta.

Ang mga dinakpan giila nga sila si Marlyn Roque, 42, taga Sampaloc, Manila;  Ma. Camille Gliane, 46, taga Sta. Maria, Bulacan ug Hanna Conception, 32, taga Sampaloc, Manila, nga temporaryong nagpuyo sa Basak, Lapu-Lapu City.

Sa imbestigasyon sa Mabolo Police nga samtang nag-grocery sa mall ang 46 anyos nga biktima nga taga Brgy. Guizo sa Dakbayan sa Mandanue nabantayan niya ang tulo nga mipaduol ug mibangga-bangga kaniya.

Nabantayan niya nga nawala na ang iyang pitaka nga dunay sulod nga duha ka Visa Cards ug usa ka libo ka pesos cash.

Dali siyang nangita sa maong mga babaye ug nagpatabang siya sa guwardiya sa mall hangtud nadakpan ang tulo sa parking area ug paingon na unta nga mosakay sa usa ka Toyota Innova nga dunay plate number AAE 5569 nga gimaneho sa usa ka alyas Cynthia kinsa nakaeskapo og dali.

Nasayran sab sa imbestigasyon nga nabiktima na sa mao gihapong mga babaye ang maong ginang niadtong Nobiyembre 17, pasado alas 4 sa hapon ug nakuhaan kadto og footage sa CCTV sa maong mall.

Atol sa maong hitabo nakuha gikan sa biktima ang iyang pitaka nga dunay sulod nga Citibank Credit Card, duha ka Metro Bank ATM Cards, LTO Driver’s License, ug uban pa mga I’Ds ug cash nga P50, 000.

Nasayran sab nga gigamit sa tulo ang iyang credit cards pagpalit og mga groceries nga mokabat og P87 mil.

Ang hepe sa Mabolo Police Station nga si Senior Insp. Jacinto Mandal Jr., miingon nga human niadtong hitabo gipa-monitor na niya ang sakyanan nga gisakyan sa grupo.

Dako ang pagtuo ni Mandal nga sakop sa usa ka organisadong grupo sa sindikato ang maong mga babaye. Gisubay usab kun kinsa ang ilang lokal nga kontak dinhi sa Sugbo.

Samtang ang director sa Cebu City Police Office, Sr. Supt. Joel Doria miingon nga ilang palawman ang imbestigasyon ug rekord sa tulo.

Natingala usab si Doria kun giunsa nga nagamit man ang credit card sa biktima nga wala pangitai og valid IDs sa mall.

Sa laing bahin, masaligon si Konsehal Dave Tumulak nga madakpan ra gihapon kining grupo nga gituohang mga langyaw nga responsable niining ATM skimming nga modus operandi nga diin usa siya sa nabiktima.

Apan giawhag ni Tumulak ang mga bangko nga mokooperar sa kapolisan nga naghimo sa imbestigasyon bahin niini. (BANAT NEWS)