4 polis “nagdawatan” og drug money
CEBU, Philippines - Mibahad ang director sa Cebu City Police Office nga iyang parelibohan sa pwesto ug pasakaan og tukmang kaso ang mga polis kung mahibaw-an niyang tigdawatan sila og drug money gikan sa mga dinakpan sa anti-drug operation sa mga sakop sa City Anti-illegal Drug Special Operation Task Group (CAIDSOTG) diha sa Villagonzalo 2, Brgy. Tejero niadtong Sabado sa kaadlawon.
Matud pa ni Sr. Supt. Joel Doria aduna siyay nadawat nga impormasyon gikan sa mga nadakpan nga dunay mga polis nga maghatagan sila og kwarta bugti sa proteksyon.
Iyahang gidasig kining mga nagsumbong nga ibutang kini sa pinanumpaang affidavit aron makapasaka og kaso ug maaksyonan kining mga badlungong polis.
Gikatahong upat ka mga polis sa Cebu City Police Office ang gilambigit sa maong pasangil. Sa pagkakaron nagpadayon ang ilang imbestigasyon bahin niini.
Apan giangkon ni Doria nga isip usa ka polis dili na ikahibulong kun adunay mga gustong makabawos kanila pinaagi sa paghimo og mga isyu nga makahasol sa mga naa sa katungdanan.
Kini ang hinungdan nga subayon og maayo sa himoon nga imbestigasyon ang maong seryoso nga alegasyon.
“Alam naman natin yan na ‘yung trabaho nang polis medyo hazardous, so prone ka sa mga kaso talaga. It’s either na banggitin lang yung pangalan mo without having evidence,” matud pa ni Doria. Atol sa maong operasyon usa ka Lolita Maranga, 56, ug Virginia Molina, 33, nga taga Sitio Mohon, Brgy. Tisa ning dakbayan ang nadakpan sa mga operatiba.
Si Maranga mao ang inahan ni Christopher Maranga nga una nang nasikop diha sa Brgy. Tisa niadtong Nobiyembre 5 gumikan gihapon sa ilegal nga drugas.
Nakuha gikan sa mga suspetsado ang pinaketing shabu nga mikantidad og kapin 600 mil pesos. (BANAT NEWS)
- Latest
