‘Surrenderers’ nangapil sa Color Fun Run
CEBU, Philippines - Mokabat sa 200 ka “drug surrenderers” ang nangapil sa “Run Free, Be Drug Free” Color Fun Run sa pagbukas sa Drug Awareness and Prevention Week kagahapon sa buntag nga gipasiugdahan sa Cebu Provincial Anti-Drug Abuse Office.
Sila kabahin sa mokabat 500 tanan nga nangapil sa kalihukan gikan sa nagkalainlaing sektor isip pagsuporta sa kampanya batok sa ginadiling drugas sa Probinsiya sa Sugbo.
Matud sa pangulo sa CPADAO, Carmen Remedios Durano-Meca, nga naabot gyud nila ang ilang target nga gidaghanon.
Ubang nangapil mga sakop sa kapolisan ug mga kawani sa gobiyerno.
Sa mga lalaki, si Police Chief Inspector Jaime Quiocho Jr. nakadawat og ganti sa pag-una sa lima ka kilometro nga dagan ug gisundan ni James Casinillo ug Shawn Patrick Casinillo.
Sa mga babaye, si PO2 Marivic Mari ang nag-una ug gisundan ni Genevive Pantollano ug Araceli Namoc.
Ubay-ubay pa nga programa ang giandam sa CPADAO sa usa ka semana nga kalihukan. (BANAT NEWS)
- Latest
