Liboan nihugop sa Birhen sa Regla

CEBU, Philippines - Gihugupan sa liboan ka deboto ang tinuig nga pangilin sa Birhen sa Regla nga maoy patron sa Dakbayan sa Lapu-Lapu ilabi na ang prosesyon niadtong Sabado sa hapon nga gisundan sa Santos nga Misa pagka-gabii.

Sa wali ni Fr. Bogie Cabrera, kura paroko sa simbahan, iyang gitumong alang sa kahiusahan sa katawhan uban ang maayong pagtinagdanay sa kauban sa trabaho, sakop sa pamilya ug ang pagtabang ngadto sa mga kabus nga nanginahanglan.

Ang prosesyon giisip nga labing mubo nga rota niining tuiga sa kapistahan sa Birhen sa Regla ang nilungtad lang og usa ka oras libot sa Barangay Poblacion ug sikbit nga mga barangay.

Higpit nga seguridad ang gipatuman sa kapolisan hinungdan nga walay kasamok ingon man krimen nga nahitabo.

Gigiyahan sab sa mga traffic enforcers ang mga motorista hinungdan nga wala nabalda ang kalihukan bisan kun sirado ang pipila ka dalan.

Nunot sa kapistahan, ang kagamhanan sa dakbayan nideklarar og walay klase ug walay trabaho sa mga buhatan sa gobiyerno karong adlawa, Nobiyembre 21, sa paghatag og higayon sa mga kawani sa City Hall sa pagpakighiusa sa ilang pamilya sa ika-281 nga tinuig nga pangilin sa Birhen sa Regla karong tuiga. (BANAT NEWS)