Pagsuspenso sa writ of habeas corpus gikabalaka
CEBU, Philippines - Nabalaka ang Commission on Human Rights sa pamahayag ni Presidente Rodrigo Duterte sa pagsuspenso sa pribilihiyo sa writ of habeas corpus aron sa pagpalig-on sa ilang kampanya batok sa ilegal nga drugas.
Matud ni Leo Villarino, imbestigador sa CHR-7, nga ang pamahayag ni Duterte makamugna og kabalaka sa mga tawo tungod kay wala na unya silay kadangpan sa higayon nga adunay madakpan sa warrantless arrest.
Sumala pa ni Villarino nga bisan sa garantiya sa Presidente nga magpokus sa kampanya sa ilegal nga drugas ang pagsuspenso niini apan daku gihapon ang posibilidad nga magamit sa pagpangabuso sa tawhanong katungod sama sa nahitabo panahon ni kanhi Presidente Ferdinand Marcos.
Dugang ni Villarino nga taas pa og proseso ang pagtangtang sa kagustuhan ni Duterte tungod kay moagi pa kini sa Kongreso tungod kay naa sa Konstitusiyon ang maong pribilihiyo.
Nipahimangno si Duterte nga mapugos siya sa pagsuspenso sa writ of habeas corpus kung magpadayon ang pagkamalapason sa ubang tawo. (BANAT NEWS)
- Latest
