17-anyos nakaluwas og bata gipasidunggan

 CEBU, Philippines - Gipasidunggan sa Bureau of Fire Protection ang 17-anyos nga lalaki nga maisugong niluwas sa usa pa ka buwan nga bata dihang niulbo ang dakung sunog sa Sitio Tagutungan, Suba, Dakbayan sa Sugbo niadtong Oktubre 25.

Ang giilang bayani mao si Justine Larry Baybay, trisikad driver, residente sa Magsaysay Extension, Sawang Calero, tungod sa gihimo aron maluwas ang bata.

Dili mominus 60 ka panimalay ang naugdaw ug matud pa nga kung dili tungod sa kaisog nga gipakita ni Baybay hayan naapil sa nasunog ang bata.

Matud ni Baybay nga dihang nakadungog siya nga dunay sunog dali niyang gipadaplin ang iyang gimanehong trisikad ug nitabang aron pagbubo og tubig sa mga balay.

Samtang nagsige siya og bubo, nakita niini ang usa ka inahan nga nagkugos sa iyang usa pa ka buwan nga anak nga na-trap sa terrace sa ikaduhang andana sa ilang panimalay diin nagkaduol na ang kayo.

Tungod niini, nagkuha og nilabhan si Baybay ug ang kahon sa mga softdrinks gipatong-patong hangtud nga gidawat niini ang bata ug giprotektahan pinaagi sa pagtabon niini sa iyang kaugalingong lawas.

Gihulagway ni Senior Superintendent Samuel Tadeo, director sa BFP-7, nga sakto lang gyud nga tawgon nga “modern hero” si Justine sanglit tagsa na lang ang mga batan-on nga mohimo og ingon niining buhat.

Gihatagan si Justine og Plaque of Recognition ug groceries isip pahalipay ug pag-ila sa iyang pagluwas sa bata ingon man scholarship aron makatungha og balik.

Gikalipay kini ni Baybay sanglit wala siya magdahum nga ang simpleng pagtabang hatagan og dakung bili tungod kay ang iya lang mao nga makatabang.

Ang inahan ni Justine, nga si Alicia, single parent, ug dunay siyam ka anak wala ikatago ang dakung kalipay alang sa iyang anak ug nagpasalamat kini sa kabomberuhan tungod sa pasidungog nga wala nila damha nga madawat.

Samtang ang igsuon ni Justine nga si Mercedes, 20-anyos, garbo kaayo sa iyang igsuon nga nitabang bisan og dili niya kabanay.

Gikonsiderar sa BFP-7 nga ilakip si Justine sa volunteer fire brigade sa barangay aron ipaubos og pagbansay-bansay sa pag-rescue kung dunay mga sunog.

Samtang gumikan sa nagkagrabeng taas nga ihap sa gidaghanon sa mga nasakit og dengue, ang buhatan sa BFP-7 nipahigayon og clean-up drive kagahapon sa buntag sa Barangay Sambag 1, Pahina Central ug sa palibot sa maong buhatan.

Dul-an sa 200 ka personnel sa BFP-7 ang niapil sa kalihukan nga gitawag og BFP-7 Anti-Dengue Clean-Up Drive.

Matud ni Senior Fire Officer 1 Wendell Villanueva, tigpamaba sa BFP-7, nga mahinungdanon kaayo ang pagpanglimpyo tungod kay adunay mga anak sa bombero nga nasakit og dengue.

Dili mominus sa tulo ka truck nga basura ang nahipos atol sa clean-up drive.

Gitug-an ni Villanueva nga nakurat ang mga tagbalay sa maong lugar sa ilang gipahigayon nga clean-up drive hinungdan nga ilang gipahimangnuan nga magmakanunayon sa ilang pagpanglimpyo aron makalikay sa sakit nga dengue. (BANAT NEWS)