Magsuong trabahador nakuryentihan

CEBU, Philippines - Padayon nga giatiman sa mga doktor ang duha ka mga managsuon human sila nakuryentehan sa dihang nasaghid ang ilang gihawiran nga kabilya sa linya sa kuryente sa VECO diha sa Sky Tower, Acacia Street ning Dakbayan sa Sugbo pasado alas 3 kagahapon sa hapon.

Ang duha giila nga sila si Geraldo ug Brando Paran, nagtrabaho sa Jam Engineering Services.

Sumala pa ni Police Officer 3 Winston Magdadaro, imbestigador sa Homicide Section sa Cebu City Police Office nga nahinabi sa Banat News dunay gitrabaho sa ikaupat nga andana sa gitukod nga building ang managsuon kay silay nagtaod og beam sa gitrabaho nga building.

Ang safety officer nga ilang kauban nga si Neil Chris Luna mitug-an sa mga polis nga mikalit lang og buto ang nahimutangan sa duha.

Daku ang pagtuo ni Luna nga posibleng gisuyop sa kuryente ang bitbit nga puthaw sa managsuon. Si Magdadaro miingon nga sa ilang nahibaw-an nga kritikal ang kahimtang ni Brando kay natagak kini gikan sa ikaupat nga andana human nalagpot gumikan sa boltahi sa kuryente.

Apan si Magdadaro nagduda nga aksidenteng nasaghiran sa mga biktima ang linya sa kuryente kay anaa ra sa ilang kilid ang linya sa kuryente.

Gidala sa managlahing pribadong tambalanan ang duha ka mga biktima nga padayon pa nga giatiman sa mga doktor. (BANAT NEWS)