‘Nerve center’ sa Lapu-Lapu mas palambuon

CEBU, Philippines - Dugang budget gamiton alang sa pagpalapad sa state of the art Nerve Command Center sa siyudad sa Lapu-Lapu.

Gawas sa pagtaud og mga CCTV cameras sa dakbayan sa Lapu-Lapu, ang City Disaster Risk Reduction Management Office mibida sa ilang Smart Dispatch screen ug sa ilang 911 computer-aided dispatch system sulod sa Nerve Command Center.

Si Andy Berame, deputy officer sa CDRRMO, nagkanayon nga anaa pa sila sa “demo stage” o kasamtangang gipaubos sa demonstrasyon sa nahisgutang sistema.

“Ni-interface mi padung sa phase 2, additional features kani atong smart dispatch radio dispatching, through GPS tracking sa atong mga corresponding units ug kani atong 911 computer-aided dispatch,” matud ni Berame. Ang phase 2 project adunay budget nga P35 milyones samtang ang phase 1 diin ang pag-butang og 51 ka surveillance camera ug unom ka LCD screens sa command center, adunay budget nga P12 milyones.

Ang Smart Dispatch screen, unang nasuwayan ni Berame atol sa fluvial procession sa  imahe sa Birhen sa Regla sa niaging Nobiyembre 12 diin migawas nga epektibo  kini nga gamiton.

 Dugang sa phase 2 mao sab ang pag-butang og fiber optics kay kun mogamit og internet protocol address mahimong makasinati kini og problema atol sa paghatag og emergency response.

Laing set sa surveillance cameras ang gipaabot ni Berame ubos sa phase 2 nga proyekto diin tumong niini, mabutangan og maayong sistema ang matag barangay lakip na ang isla sa Olango. Gilauman ni Berame nga mahimong operational ang phase 2 sunod tuig aron mas paspas ang paghatag og emergency response ug serbisyo ang mga residente sa dakbayan sa Lapu-Lapu.

Pinaagi sa Nerve Command Center nga gagamit ug modernong ekipo, dili lang trapik ug mga aksidente sa kadalanan ang makita niini kay lakip na ang mga mahitabong kriminalidad. Christell Fatima M. Tudtud ug Rowena D. Capistrano (BANAT NEWS)