Lawas konektado sa mga Espinosa?

CEBU, Philippines - Andam moatubang ang deputy regional director for operations sa Police Regional Office-7 sa bisan unsa nga imbestigasyon human gilambigit ang iyang pangalan nga konektado sa operasyon sa illegal nga drugas sa mga Espinosa sa Albuera, Leyte.

Si Sr. Supt. Rey Lyndon Lawas nga nahinabi sa mga tigbalita miingon nga  wala kini nakaila sa mga Espinosa, ni Kerwin o sa mayor ug wala gayod pa kini niya sukad nakaatubang sa personal. Giangkon ni Lawas nga nakakita na sab kini sa balita ug napahibalo na sab kini sa iyang mga kaila ug kini natingala nganong naapil ang iyang pangalan.

“Mao ra ni akong ikasulti wala ko kaila nila, I have not met them, I have not known them,” saysay pa ni Lawas.

Nagtuo si Lawas nga lagmit nakaila niya ang mga Espinosa kay anaa man kini sa panerbisyo ug igo lang gigamit ang iyang pangalan.

Si Lawas miingon nga sulod sa daghang katuigan sa iyang pagpanerbisyo iyang giampingan ang iyang reputasyon ug ang iyang pangalan.

Wala na sab mihatag og komento pa si Lawas kung kinsa ang iyang gidudahan nga nagpaluyo nga iapil ang iyang pangalan apan kini nanghinaot nga unta ang tinuod lang nga estorya ang mogawas.

“Ang ato lang nga ato lang isulti ang tinuod lang jud, lisod kaayo nga magdaot ta og usa ka tawo, ato baya gyud ning giampingan og maayo.

Let’s us be truthful and honest because naa may Ginoo nga nagtan-aw kabalo man ang Ginoo unsa ta nga klase nga pagkatawo sa publiko,” matud pa ni Lawas.

Matud niya kung siya ipatawag sa ilang mga labaw andam kini nga moatubang sa bisan unsa nga imbestigasyon ug aron usab sa paglimpyo sa iyang pangalan sa mga alegasyon. (BANAT NEWS)