Vidal wa kabisita

CEBU, Philippines - Samtang si Archbishop Emeritus Ricardo Cardinal Vidal ang wala sab makaduaw sa lubong sa iyang mga minahal sa kinabuhi sa Carreta tungod kay nagpahuway sa iyang panimalay human nahospital gikan sa iyang biyahe sa Roma.

Nagtuo si Msgr. Joseph Tan, tigpamaba sa Archdiocese of Cebu, nga hayan mobisita ra si Vidal sa iyang amahan ug iyaan kung dili na samok sa mga tawo ang  sam-ang.

Gikonpirmar ni Tan nga dili pa dugay nakagawas sa tambalanan ang cardinal human nasulod sa Intensive Care Unit sulod sa upat ka adlaw. Ang kabugnaw sa Roma ang gituohang hinungdan nga naluya ang cardinal.

Si Msgr. Ruben Labajo, ang kura paruko sa Cebu Metropolitan Cathedral, maoy niresponso sa lubnganan sa amahan ni Vidal ug iyaan kagahapon sa buntag human sa Santos nga Misa sa kapilya sa Carreta-Sto. Rosario.

Sumala pa ni Labajo nga sila maoy nagmintinar sa pagpasuga sa maong lubnganan ug sa pagpanglimpyo sa maong lugar agi og pagpakita nila og  pasalamat ngadto sa talahurong cardinal.

Si Labajo sa iyang homiliya nagkanayon nga ang kamatayon sa tawo dili maoy katapusan tungod kay adunay kinabuhi human sa kamatayon.

Sumala pa ni Labajo nga ang kasaulogan sa adlaw sa mga kalag maoy nindot nga kahigayunan tungod sa mga pag-ampo alang kanila.

Matud ni Labajo nga ang Ginoo maloloy-on ug mahigugmaon hinungdan nga kinahanglan nga ang tawo mosalig sa kalooy ug gugma niini diin bisan sa ilang kalit nga kamatayon hatagan sila og kaluwasan.