Naghikog atubangan sa maestrang asawa

CEBU, Philippines - Bana nga naghambin og grabeng selos sa maestra niyang asawa nagpusil sa kaugalingon niyang ulo atubangan sa iyang kapikas samtang iya kining gigakos kaniadtong Martes sa udto.

Ang nagpakamatay mao si Noel Ugbinada, hingkod ang panuigon, walay trabaho, ug lumolupyo sa Sitio Sinsin, Barangay Bato, dakbayan sa Toledo.

Gikatahapan ni Ugbinada ang 35-anyos niyang asawa nga si Desiery nga may lain kining gimahal mao nga kanunay na lang siya nga maghubog-hubog. Nahibaw-an sa kapolisan nga diha’y higayon nga nag-inilogay ang bana’g asawa sa selpon ni Desiery tungod kay gusto nga sutaon sa bana kun husto ba ang iyang katahap nga nagbudhi kaniya ang iyang asawa.

Si Desiery nagtudlo sa usa ka publikong tunghaan sa dakbayan sa Toledo. Si PO2 Joselito Genon, desk officer sa Toledo City Police Station, mitug-an nga namatay si Ugbinada kay milapos sa iyang ulo ang bala sa .38 kalibre nga revolver nga gigamit niini paghikog.

Sa imbestigasyon sa kapolisan ilang nasayran nga 12 ka tuig na nga kasal ang magtiayon ug gani may tulo na sila ka anak. Nakabantay ang asawa nga ang iyang bana kanunay na lang hubog nga mopauli.

Kini maoy hinungdan sa ilang panaglalis. Pipila ka adlaw ang milabay naglalis na usab ang magtiayon ug milakaw sa ilang balay ang bana ug didto miestar sa balay sa iyang ginikanan.

Pagbalik niini sa ilang balay hubog na usab si Ugbinada ug gikuha ang selpon sa iyang asawa tungod sa iyang pagduda nga may lain kining lalaki.

Nag-inilogay gani ang magtiayon sa selpon, apan wala mahibaw-i kun unsay nasayran ni Ugbinada gikan sa selpon. Kaniadtong Martes sa udto, gigakos ni Ugbinada ang iyang asawa ug dayon nagpusil siya sa iyang ulo.

Narekober sa mga polis ang usa ka .38 kalibre nga revolver nga gituohang maoy gigamit sa bana sa pagpakamatay.