Inahan, duha ka menor gipamusil
CEBU, Philippines - Usa ka inahan ug duha ka menor de-edad na-admit sa ospital human sila gipangpusil sa usa ka tiguwang gamit ang pugakhang didto sa Barangay Tulay, Minglanilla kaniadtong Martes sa gabii.
Si Chief Inspector Florendo Fajardo, hepe sa Minglanilla Police Station, miingon nga ang 41-anyos nga babaye nga nakaangkon og pinusilan maoy inahan sa usa sa duha ka menor de-edad nga gipamusil.
Matud ni Fajardo nga ang suspetsadong mipusil sa mga biktima nailhan nga si Remegio Enorsa-on, 68, nga nadakpan na sa kapolisan ug gitanggong na sa bilanggoan.
Dili hinuon kaayo grabe ang kahimtang sa mga biktima nga nakaangkon lang og gagmay’ng samad agi sa bala sa pugakhang. Gikang nanagkot sa menteryo ang mga biktima diha nga sila gipamusil.
Ang tiguwang misaysay sa kapolisan nga tuyo niya nga pusilon mao lang ang duha ka menor de-edad apan napagan ang inahan sa usa ka batan-on.
Matud pa nga naglagot ang tiguwang sa duha ka batan-on nga giingong kusog mang “trip-trip” sa ilang dapit kuyog ang ilang kagrupo ug malagmit nabugalbugalan nila ang suspetsado.
- Latest
