‘Polis-Polis’ kolektor sa mga pushers

CEBU, Philippines - Ningpiyait ang pipila ka tawo nga nalambigit sa ilegal nga drugas sa Barangay Tanke, Dakbayan sa Talisay labot sa nagpa-polis-polis ug nangilkil kanila.

Ang tawo nipasalig nga dili sila sikopon kun sila mohatag lang og kwarta kaniya.

Ang mga operatiba sa Talisay City Police Station nipahigayon og operasyon batok sa ilegal nga drugas ug girumbo ang pinuy-anan ni Jowely Malacay kinsa giingong tiggamitan og ilegal nga drugas.

Apan dihang nakit-an sa mga operatiba si Malacay, pakyas sila sa pagkuha og drugas apan boluntaryo nga nitahan sa mga awtoridad ug niangkon nga siya tiggamitan og ilegal nga drugas ug aduna sab siyay kaso sa paghupot og armas.

Dihang nanglakaw na ang kapolisan uban si Malacay, diha sa karsada ang usa ka lalaki nga nailhan ni Malacay nga Mendoza nga nagmaneho og motorsiklo ang dali nga nituyok balik sa agi sa dihang nakakita sa kapolisan.

Gisusi sa mga polis ang gihulagway ni Malacay nga tawo ug nailhan nga usa ka Edgar Miñoza nga may kasong usurpation of authority and official function ug duha ka kasong robbery sa ilang buhatan.

Si Miñoza ang nasikop na niadtong Abril gumikan sa iyang pagtulis sa usa ka tindahan sa cellphone ug nasikop sab kini tungod sa iyang pagpa-polis-polis ug nangilkil og usa ka outlet sa illegal numbers games.

Si Malacay nitug-an sa kapulisan nga si Miñoza nga nailhan nila nga si Mendoza ang mosuroy sa ilang dapit matag duha ngadto sa tulo ka semana aron sa pagkolekta sa tag P200 ngadto sa P500 gikan sa mga tawo nga namaligya og ginadiling drugas sa ilang lugar.

Si Miñoza ang wala naabti sa mga awtoridad dihang gigukod apan naa na ang iyang pangan sa ilang listahan. (/GMR)  (BANAT NEWS)