Lemuel Rosos “Fashion is my Passion!”

CEBU, Philippines - Wala siya’y formal training isip fashion designer. Bugtong pangandoy maoy nagganoy niya paingon sa iyang nahimutangan karon, diin inanay na siya nga naila, dili lamang dinhi sa Sugbo, kundili sa kaulohan usab. Ang pipila sa iyang mga mugna nahiabot na sab sa nagkadaiyang dapit sa kalibutan. Siya walay lain kun dili ang inila nga designer nga si Lemuel Rosos, 38-anyos, lumad nga taga Sta. Fe, Bantayan, Cebu.

Nigradwar si Lemuel sa kursong BS-Biology sa Southwestern University-Phinma. Ilado siya dinhi sa Sugbu isip Fashion Designer, Make-up artist, Event Specialist, Beauty King and Queen trainer, Fashion and Pageant Director, ug Managing director sa kaugalingon nga Production.

Kinamagwangan nga anak si Lemuel, sa usa ka public school teacher ug negosyante nga mga ginikanan. Bata pa lang, mahiligon na si Lemuel magduwa og mga dresses sa mga kaduwa niining mga babaye. Usa sa mga gikalingawan ni Lemuel mao ang katabang sa iyang lola diin bistihan niya kini og kurtina ug papasuhon sulod sa panimalay.

Nitungha sa high school si Lemuel sa St. Paul Academy nga gidumala sa mga Augustinian sisters. Samtang naminaw sa discussion sa iyang maestra, sige siya og sketch sa bisan unsang desinyo nga sinena. Gawas niana, nagsugod na siya og desinyo ug tahi sa mga sanina sa iyang mga higala ug paryente bisan pa man sa linghod nga pangidaron. Kun aduna’y kalihokan ang iyang gitunghaan siya ang modesinyo sa stage. Ang iyang maestra niadtong hayskul ang nagpursige niya sa pagpalambo sa iyang talento dili lang sa pagdesinyo, lakip na ang pagtudlo og sayaw.

Wala’y klarong kurso

Sa college, nawala ang interes ni Lemuel sa pag-design kay matod pa niya mahiligon siya sa subject nga Science. Gibutyag ni Lemuel nga gusto sa iyang lolo nga mag-medicine siya. Nagpa-enrol siya sa kursong BSPT sa SWU-Phinma isip preparatory course. Maayo og performance sa iyang klase si Lemuel kay nilaylo na kini sa pagdesinyo. Apan sa pagtikang sa ikatulong ang-ang sa kolehiyo, nahagbong kini ug ni-shift sa kursong BSPE kay mahiligon man siya og sayaw. Presidente ang apohan ni Lemuel sa maong tunghaan ug nalisang pagkahibaw nga nikuha kini og BSPE. Daling gipaundang sa maong kurso si Lemuel ug nikuha sa kursong BS-Biology. Dinhi, nahibalik sab ang hilig niya sa fashion designing. Siya ang naggasto sa kaugalingon sa pagpadayon og skwela. Ang iyang income mao ang halin sa pag-make-up, pagtudlo og sayaw sa nagkalain-lain nga mga hotels sa Sugbu lakip na didto sa Dumaguete. Nagkadaghan ang mga kliyente ni Lemuel.  Kay wala pa may kaugalingon nga shop, kun aduna’y kliyente si Lemuel iya kining dad-on sa sikat nga mall kaniadto ug amigahon ang mga sales lady aron tugotan nga adto magsukod og nagkalain-laing sinena. Gumikan sa pagpaningkamot ug pagkugi ni Lemuel, nigradwar gyud siya sa kursong BS-Biology.

Paghashas sa talento

Niuli sa Sta. Fe si Lemuel human sa iyang graduation ug didto nagtukod og kaugalingon’g boutique. “Gamit ang karaang balay sa akong lola, nag-shop ko, more on wedding.” Nag-inusara nga nagdumala si Lemuel sa iyang boutique diin kun ihulagway niya, “one man show”, siya sa mga kalihukan hilabi na ang kasal. Nilungtad og tulo ka tuig ang maong negosyo ug nahashas gyud iyang talento tungod niini apan gipasirado niya kini.

“I’m a kind hearted person man gud, maluoy ko kun pangutan-on na ko pila ang abang kay puro ra nako mga kaila tanan didto ug mga paryente. Hangtod karon gani,dili pa ko kahibaw mobungat og presyo,” butyag pa niya.

Nibalik sa Cebu si Lemuel ug niskwela na sab og kursong BS-Nursing sa samang unibersidad ug nag-abli sab siya og kaugalingong shop. Samtang nag-skwela siya, gikuha si Lemuel sa ilang dean aron modumala sa kasal niini.

Tuod man, giganahan kaayo ang dean sa resulta sa iyang kasal. Niadtong panahona, wala pa siya’y kaugalingon nga shop, ug moadto ra siya sa balay sa iyang suki nga mananahi aron sa pagpatahi sa gidesenyo’ng sinena. Nagkadaghan ang iyang mga kliyente.

Naluoy ang iyang kanhi mananahi ug nakahukom nga paabangan ang gamay nga pwesto niini didto sa V.Rama sa kantidad nga P3,500.

Matag bayad sa mga kliyente ni Lemuel, iya kini gidata sa maong pwesto nga gipaabangan, ug hangtod anam-anam nga nahitsura na gyud iyang shop.

Samtang nag-eskwela, padayon si Lemuel sa pagpadagan sa iyang negosyo. Apan sa dihang nag-on-the-job-training na siya sa ospital, midesisyon kini nga moundang sa pag-skwela kay nagkadaghan iyang mga kliyente ug mas gipili niya nga mag-focus sa fashion designing.

Usa sa nakapadaghan sa iyang mga kliyente mao ang promosyon gikan sa sikat nga mga personalidad dinhi sa Sugbu sama ni Bischikador Yuri. Si Lemuel ang designer sa tanang isul-ob ni Yuri sa programang “Oi Show Nato Ni!” kaniadto matag Domingo sa GMA7.

“Every Sunday, ako ang mohimo sa iyang outfit, niya i-promote ni Yuri, hangtod nisikat akong pangalan. Pakk! After ana kay daghan na moadto sa akong shop,” sigun pa niini.

Nakapalit siya og kaugalingon nga makina ug dili na siya modagan pa ngadto sa iyang mananahi. Nagkadaghan ang kliyente, nagkahuot sab ang iyang luna. Ang likod sa iyang shop gipaabangan na sab sa iyang mananahi.

“Additional nga abangan. Hinayhinay lang gyud hangtod nahimutang gyud akong pwesto sa V. Rama.” Walay pormal nga edukasyon sa fashion designing si Lemuel, dili sama sa mga sikat nga mga designers sa nasud. Plano niya nga mo-eskwela sa Saudi kaniadto apan wala siya tugti sa iyang inahan.

Apan wala kini niya giisip nga babag sa pagkab-ot sa iyang pangandaoy, gani daghan ang nisalig sa iyang talagsaon nga talento.

“I don’t have formal background on fashion. I’m self-taught ... risk taker man gud ko. The love for fashion is my passion,” sigon pa     niya. Gipaambit ni Lemuel nga kun mo-design siya, gusto niya nga labaw pa sa expectations sa iyang kliyente ang masulti kun makakita sa iyang mugna. Dugang niya, dili siya mag-apas sa gibayad, basta inig gawas sa iyang kliyente sa iyang shop malipayon lang sila. Ang kasagaran nga presyo sa mga gowns modagan ngadto sa P10,000 pataas apan sa Bridal gowns modagan kini ngadto sa P35,000 - P40,000.

Tulo ka tuig kapin sab si Lemuel sa iyang pwesto sa V. Rama. Mapasigarbuhon nga gibutyag ni Lemuel sa Banat News-Tingusbawan nga sa V.Rama siya nagkapalit og kaugalingon nga sakyanan.

Nahagit si Lemuel sa iyang mga kliyente human siya giingnan nga kinahanglan na siya mobalhin og mas dako ug hamogaway nga lugar.

Nakakita og pwesto si Lemuel sa Banawa nga P60,000 ang abangan matag buwan. Giangkon ni Lemuel nga wala siya nakatulog human nakakita sa maong pwesto kay naghinam-hinam gyud siya nga maangkon kini. Gipareserba niya kini ug pipila lang ka semana ang nilabay nakuha na niya ang bag-ong lokasyon.

Unom na ka-tuig ang shop ni Lemeul Rosos sa kasamtangan nga lokasyon niini sa Banawa. Matud ni Lemuel, dili kalit ang pag-usbong sa iyang negosyo sama sa uban. Nakita sa iyang mga suki ang inanay nga paglambo sa iyang shop.

Fashion Industry sa Sugbo

Dili ikalimod nga magmalambuon ang Fashion Industry dinhi sa Sugbu ug dako kini og gikatampo pagpalambo sa turismo ug kultura sa probinsya.

Si Lemuel ang presidente sa FDAF kon Fashion Designers Association of the Philippines- Cebu Chapter. Kauban niya ang sikat nga Sugbuanon nga mga designers sama nilang Danny Booc, Harley Ruedas, Jun Escario ug Elmer de Venancio ug uban pa. Usa sa ilang kalihukan mao ang bag-ohay pa lamang nga The Body Shots- Cebu search. (BANAT NEWS)