Gang sa mga minors

CEBU, Philippines - Naalarma karon ang kapolisan ug opisyal sa siyudad sa Sugbo kalabot sa giingong pagsulbong sa usa ka gang diha sa usa ka pangpublikong eskuylahan sa Brgy. Labangon nga giingong nang-recruit og mga miyembro.

Matud pa usa  usab ka menor de edad ang giingong ‘founder’ sa maong grupo nga gitawag og AKP "Akong Kugmo Parat" base sa hulagway nga nakuha sa Banat News. Matud pa sa impormasyon, nang-rekrut kini sa elementarya.

Way opisyales sa maong tunghaan ang nakahatag og kompletong katin-awan bahin sa maong hitabo apan giingong adunay usa ka apohan sa usa sa mga gi-rekrut nga nireklamo ngadto sa eskuylahan kay gihilantan iyang apo.

Gituohan nga adunay ‘initiation’ nga nahitabo kay base sa mga hulagway nga nakuha sa Banat News, ang mga bata gipatikan og mga letrang “AKP” sa tuo ug walang mga bukton. Giingong lapis ray gigamit sa pagpatik sa ilang bukton nga nangasamdan.

Matud pa sa nadawat nga impormasyon sa Banat News, giingong gihusay na ang maong reklamo diha sa guidance office sa maong tunghaan.

Samtang usa ka magtutudlo  sa kindergarten (pangalan gipugngan sa Banat News) sa maong tunghaan nga maoy naabtan sa Banat News nga nanglimpyo kagahapon diha sa tunghaan wala mokompirmar bahin sa maong ‘recruitment’ sa gang diha sa ilang eskuylahan.

Apan iyang gibutyag nga niadtong Oktobre 10 atol sa ilang tigum sa eskwelahan gitawag ang atensyon sa mga advisers sa grade 5 ug 6 tungod sa matud pa presensiya sa giingong mga gang leaders nga manghingi sa mga tinun-an.

Sumala pa niya, wala siya masayod kung aduna bay mga tinun-an nga na-recruit. Apan iyang gibutyag nga duol ra sila sa high school ug aduna say sam-ang duol sa ilang eskuylahan nga gihimong abutanan sa mga batan-on.

Samtang si Junjun Daruca, brgy tanod ug desk officer sa Barangay Labangon nitug-an nga wala sila nakadawat og reklamo bahin niini ug wala usab sila mahibalo  nga adunay mga gangs sa maong tunghaan.

Si Konsehal Hanz Abella , ang tsirman sa committee on education sa Konseho sa dakbayan buot mohimo og imbestigasyon lakip ang pagsusi sa maong taho kung duna bay nahitabo nga hazing.

Ang konsehal mipasidaan nga dili maayo sa mga bata ang moapil-apil og gangs. Tungod niini, plano niyang pakigtaboan ang kadagkuan sa maong eskuylahan.

Samtang wala gidili ang pagtukod og mga grupo ug organisasyon sama sa mga fraternities ug sororities sa mga kabataan dinhi sa nasud, apan hugot gidili ang pagpang-recruit niining mga matang sa organisasyon og mga menor de edad kay kalapasan kini sa balaod.

Gidili usab sa Republic Act 8049 (Anti-Hazing Law) ang initiation rites nga maglangkob og ‘hazing’ o kadtong pagpasakit, pagpakauwaw ug uban pang makapaubos sa pagkatawo sa usa ka rekrut aron lang sila dawaton sa grupo. (BANAT NEWS)