3 kompaniya interesado sa basurahan sa Talisay

CEBU, Philippines - Tulo ka kompaniya ang interesado nga modumala sa labayanan sa basura sa Dakbayan sa Talisay.

Matud ni Bise Mayor Alan Bucao nga ilang gihatagan hangtud sa Nobiyembre 5 ang mga kompaniya sa pagduso sa ilang proposals.

Usa ka kompaniya nipahibawo ilang ibutang ang ilang pasilidad sa Pond A ug sa Pond B diin pulos na puno sa basura.

Sa pagkakaron, ang Pond C na lang ang gigamit.

Gibana-bana nga sulod sa 10 ka tuig mapuno na gyud ang labayanan kun ang basehan mao lang ang gidaghanon sa mga basura gikan sa tibuok Talisay nga moabot sa 10 ka toneladas matag adlaw.

Samtang ang ikaduhang kompaniya nga nipakita sa konseho atol sa ilang regular session nipahibawo nga aduna na silay yuta tapad sa labayanan sa siyudad ug buot sab nila kining himuon nga pribadong labayanan.

Ang ila lang mao ang pagkuha og pagtugot sa konseho aron sila makakuha sab og environmental compliance certificate (ECC) aron makapadayun sa ilang plano nga negosyo.

Ang ikatulo ang nipasabot sab sa mga opisyal nga ilang igahin ang ilang tinguha sa labayanan pinaagi sa paglain-lain sa mga basura ug pangitaan og paagi nga ang mga basura nga maabot sa labayanan nga magamit pa.

Matud ni Bucao nga mas pabor sila sa mga kompaniya nga modawat lang og basura gikan sa 22 ka barangay sa siyudad ug dili sa ubang mga lugar nga basura. (BANAT NEWS)