Unsay makita sa adunay ‘third eye’?

CEBU, Philippines - Dili ikalimod nga aduna gyuy mga kahibulongang masinati sulod sa sementeryo ilabi na niadtong mga tawo nga adunay espesyal nga gasa ug gani bisan asang lugar, makabatyag sila niini.

Ang maong mga tawo gigasahan og third eye o kadtong makakita ug makasinati sa presensiya sa dili ingon nato.

Si Ronald Torres, helper sa usa ka electrician nga nagtrabaho sa sam-ang sa Carreta ug lumad nga taga San Isidro, Surigao del Norte nitug-an nga 8 anyos pa lang siya dihang unang nakakita og dili ingon nato ug hilig usab siyang magduwa-duwa sa mga kahoy sa balete diin aduna siya’y daghang makita nga wala makit-i sa ubang tawo.

Sumala pa ni Torres nga atol sa unang adlaw niya sa sementeryo aduna siyay nakita nga bata nga nagduwa-duwa diin nabulit ang nawong niini sa dugo, hinungdan nga iya kining gipahinungdan og pag-ampo.

Gawas sa bata aduna usab siya’y nakita nga babaye nga adunay higot ang walang tiil ug nakighinabi kaniya. Matud sa maong babaye nga biktima siya sa pagpanglugos ug gilabay siya sa usa ka lugar. Asoy pa ni Torres nga nangayo kaniya ang maong babaye og pag-ampo kay nahikalimtan na siya sa iyang mga kabanay.

Laing gitug-an ni Torres nga nakakita na usab siya og agta sa dakong punoan sa kahoy.

Dili niya makalimtan dihang gigukod siya og lungon nga naglutaw didto sa ilang baryo.

Niadtong nilabay nga Biyernes, niugbok si Torres og 9 ka kandila alang niadtong mga kalag nga biktima sa inhustisya ug katalagman aron wala nay maghamok kaniya.

Awhag ni Torres sa katawhan nga dili magpadala sa kahadlok ug ipatigbabaw ang dakong pagtuo ngadto sa Ginoo.

Samtang si Jo-ann Ravina nga taga Brgy. Mambaling sa dakbayan sa Sugbo niasoy usab sa kahibulongan hitabo sa iyang kinabuhi. Dihang naligo siya sa pansayan sa bag-ong gitukod nga boarding house, nakadungog siya og hinay nga hilak sa babaye hinungdan nga nangabli siya apan walay tawo.

Dihang gisirad-an niya og balik ang pultahan ug naligo, nakadungog na usab siya sa maong hilak sa babaye hinungdan nga nangabli na usab siya sa pultahan apan wala gihapoy tawo. Sa ikatulong higayon sa iyang pagtiwas og kaligo, nikusog ang hilak sa babaye ug sa iyang paggawas, nagbarug sa kilid ang babaye nga nagduko.

Sa iyang kahadlok, naingnan ni Ravina ang maong babaye og "manghadlok man ka nga naligo man ko”

“Dayon dagan nako sa ubos oi, kulba ug hadlok kaayo kay dili maklaro ang iyang nawong" dugang pa ni Ravina

Ang kura paruko sa Archdiocesan Shrine of San Roque sa Brgy. Mambaling nga si Fr. Mhar Vincent Balili atol sa programang Barkadahay Bag-ong Tambayan sa DyRF1215 nibutyag nga kinahanglan gyud ang pag-ampo ug pamisa alang niadtong mga kalag nga wala nay nakahinumdum ug mga kalag nga wala pa hingpit nakadawat sa ilang kamatayon.

Gitug-an ni Balili anaa sa pag-ampo nalakip ang mga makita ug dili makita. (BANAT NEWS)