San Fernando butangan og pantalan
CEBU, Philippines - Makabaton na unya og pantalan ang lungsod sa San Fernando sa umaabot nga tuig kini sumala pa ni First District Congressman Gerald Anthony “Samsam” Gullas sa dihang ilang gigahinan og pundo ang maong katuyuan sa ilang gihimo nga 2017 General Appropriations Act.
Gibutyag sa kongresista nga gastuhan ang maong proyekto og P358 milyones.
Matud ni Gullas nga kun mapatuman na ang maong pantalan, dali na lang unya ang paghatud sa nagkadaiyang produkto gikan sa ubang lugar sa nasud kay diha na man lang manukad sa Barangay South Poblacion sa maong lungsod.
Iyang gibana-bana nga mobiyahi lang og 919 kilometer nautical highway ang barko gikan sa Luzon paingon sa Mindanao pinaagi sa RORO vessel.
Gawas nga mapadali na unya ang paghatud sa mga produkto ug sa mga tawo, makahatag sab kini og panginabuhian sa mga taga San Fernando nga makapalambo sa ekonomiya.
Ang mga biyahe unya sa maong pantalan mao ang Batangas ug Misamis Oriental sa Mindanao paingon sa Mindoro Oriental, Aklan, Iloilo, Negros Occidental, Cebu, Bohol ug Camiguin.
Ang maong pantalan dumalaon sa Cebu Port Authority (CPA). (BANAT NEWS)
- Latest
