‘Anti-poverty projects’ umulon aron mahaw-as sa kalisod

CEBU, Philippines - Ang kagamhanan sa probinsiya sa Sugbo mogama pa og mga “anti-poverty nga proyekto o makahaw-as sa kalisod sa mga konstituwente niini. Kini nunot sa report sa Philippine Statistics Authority (PSA) nga ang rehiyon-7 adunay taas nga poverty incidence.

Si Gobernador Hilario Davide, III nagkanayon nga mogama pa sila og mga anti-poverty program.

Iyang gibutyag nga sila si Gobernador Edgar Chatto sa probinsiya sa Bohol naghisgot kun unsay ilang matabang sa tagsa-tagsa nila ka probinsiya aron masolusyonan ang maong problema dihang nagkaabot sila didto sa Manila sa nilabay’ng adlaw. Matud ni Davide nga posibleng ipaabot nila kini ngadto sa Regional Development Council (RDC) aron makagama og mga anti-poverty measures.

Ang probinsiya sa pagkakaron aduna kini anti-poverty program nga mao ang Farmers Scientist Training Program (FSTP).

Tumong sa maong programa nga ang mga mag-uuma matudloan og mga pamaagi sa ilang panginabuhian pinaagi sa pagpanguma ug pag-atiman og mga hayopan aron sila mahaw-as sa kalisod. Gihatagan usab sa pagtagad sa Kapitolyo ang food security.

Sa ulahing report sa PSA sa official poverty statistics sa nasud, sa kinatibuk-ang tuig sa 2015 ang poverty incidence sa mga Pilipino sa tuig 2015 gibana-bana ngadto sa 21.6 porsiyento. Sa maong period sa tuig 2012 niabot ngadto sa 25.2 porsiyento ang natala nga poverty incidence sa mga Pilipino.

Subay niini, ang gidaghanon sa mga Pilipino nga ang income ubos sa “food threshold” o mga kabus kaayo gibana-bana ngadto sa 8.1 porsiyento sa tuig 2015 samtang sa tuig 2012 niabot sa 10.4 porsiyento.

Sa food threshold nag-require kini og minimum income alang sa gikinahanglan nga basic foods alang sa saktong nutrisyon base sa Food and Nutrition Research Institute (FNRI). Sa tuig 2015, ang usa ka pamilya nga dunay lima ka miyembro kinahanglan nga adunay P6, 329 nga average income matag buwan aron makuha nila ang basic food needs. Ug mga P9, 064 nga income matag buwan aron makuha niya ang basic food ug non-basic food. (BANAT NEWS)