76 paresan nagpakasal
CEBU, Philippines - Ang Dakbayan sa Sugbo nipahigayon og mass wedding kagahapon nga gisalmotan sa 76 ka mga paresan nga dugay nang nagpuyo-puyo nga way bendisyon sa Sakramento sa Matrimonya o Kaminyoon.
Ang mass wedding anha gihimo sa Cebu Metropolitan Cathedral Church nga gigahinan sa siyudad og P800 mil alang sa ilang kasal ug sa reception alang sa mga nahimo nang kasado nga managtiayon.
Usa kanila ang magtiayong Pilar,48, ug Edwin Malabat,52, nga malipayong gikasal kagahapon human sa pag live-in og 20 ka tuig.
“Kun dili tungod aning higayona, dili gyud mi makasal og simbahan. Maglisod gani mi pakasal og huwes, simbahan pa nuon. Maong mapasalamaton kaayo mi sa siyudad sa pagpahigayon ani,” matud ni Edwin.
Masaligon si Pilar nga karon may bendisyon na sa sakramento sa kaminyoon ang ilang panag-uban makapaabot na sila og dugang mga grasya gikan sa Kahitas-an.
Ang maong mass wedding gipangulohan ni Cebu City Women and Family Affairs Commission head Lea Japson, kinsa mao usab ang pangulo karon sa Department of Social Welfare and Services.
Matud ni Japson nga ikanapulo na kini ka tuig nga ang siyudad nipahigayon og mass wedding nga adunay temang “Pamilya Palig-onon diha sa Sakramento sa Kaminyuon.”
Mihatag ang siyudad og tagsa ka lechon kada pares, usa ka cake, ug makadala sila og napulo ka guests ang kada pares diha sa reception nga gihimo diha sa IEC Pavilion.
“Usa sa purpose ana is atong ipa-solemnize sila kay I believe aning family that prays together, stays forever. And then ma-solemnize sila, so naay blessing gyud gikan sa Kahitas-an kaysa kun wala. Murag mahug ang ties nila as couple mograbe gyud,” dugang pasabot ni Japson.
Mitambong sa maong kasal sila si Mayor Tomas Osmeña, Councilors Margarita Osmeña, Hanz Abella ug Eugenio Gabuya. (BANAT NEWS)
- Latest
