Recla giparelibuhan sa iyang naligsan?

CEBU, Philippines - Daku ang pagtuo ni kanhi Talisay City Police chief PSupt. Aileen Recla nga mugna sa mga ilegalista nga iyang naligsan hinungdan nga siya girelibuhan sa pwesto. Si Recla nalakip sa 123 ka mga polis nga idestino na sa Camp Crame. Kagahapon, pormal siyang nanamilit ug nagpasalamat kang Mayor Eduardo human sa tulo ka buwan niyang pagserbisyo sa dakbayan.

Gibarugan ni Recla nga limpyo siya ug wala’y koneksyon sa tanang matang sa ilegal sukad nga siya nahimong polis. Iyang gikasakit nga siya gihukman dayon sa publiko hinungdan nga iyang panawagan nga paabuton na lang ang resulta sa imbestigasyon kay siya nagtuo nga malimpyohan ra niya ang iyang pangalan.

Matud niya nga binuhatan sa mga tawong iyang naligsan atol sa subsob nga kampanya batok sa ilegal nga drugas hinungdan nga siya gipalagpot sa pwesto.

Iyang gitataw nga kining mga tawhana maoy una pang nahibawo sa iyang relieve order kay sa niya hinungdan nga sila karon nagkatawa. Apan iyang gipanganti nga bisan og wala na siya sa Talisay, iyang hatagan og mga pangan sa mga ilegalista ang mulingkod nga hepe sa dakbayan. Gitambagan na ni Recla ang iyang deputy nga si PSInsp. Edward Villarin sa iyang pagabuhaton samtang nagpaabot sa bag-ong molingkod nga hepe sa kapolisan sa Talisay.

Kahinumduman nga sa pagdumala ni Recla sa Talisay, nakadawat ang Talisay City Police og pasidungog isip top performer sa mga dakop labot sa ilegal nga drugas lukop probinsiya sa Sugbo. Gani karong bag-ohay sila giila nga top performer sa mga operasyon labot sa ginadiling drugas lukop rehiyon. (BANAT NEWS)