2 ka tulisan napatay sa pinusilay

CEBU, Philippines - Napatay sa kapolisan ang duha ka suspetsadong tulisan nga nakigpinusilay kanila atol sa ginukdanay didto sa Borbon human nga gitulis sa maong mga tulisan ang usa ka salesman og beer.

Si PO1 Ivanry Davidnon sa Borbon Police Station miila sa mga napatay nga sila si Phil-Am Camingawan, 35, ug Ritchie Ebarita Demy, 23, pulos taga Barangay Gun-ob, Dakbayan sa Lapu-Lapu.

Gitumbok sila nga maoy mibiktima ni Chemuel Laribe, 33, taga Magay, Compostela nga gitulis didto sa Barangay Bawo, lungsod sa Sogod kaniadtong Martes sa alas dos sa hapon.

Matud ni PO1 Davidnon nga si Laribe dali nga nakapahibalo kanila pinaagi sa police hotline nga gitulis siya sa duha ka tulisan nga nagsakay og motorsiklong itom ug gikuha ang iyang bag nga gisudlan sa halin. Ang hepe sa  Sogod Police nga si Senior Inspector Danilo Santillan abtik nga mimugna og blocking force kay giingnan sila sa biktima nga ang mga tulisan nga nagsakay og itom nga motorsiklo ug nagsul-ob og itom nga jacket mipaingon sa amihanang bahin sa Sugbo. Taud-taod nalantawan sa mga polis ang nagsingabot nga motorsiklong itom ug ang nagsakay niini nagsul-ob og itom nga jacket. Gisinyasan nila kini nga mohunong apan mibulhot hinoon pagpadagan.

Ang kapolisan dali nga migukod sa motorsiklo apan ang angkas niini mipusil sa mga polis nga naggukod kanila, hinungdan nga gibawsan sila pagpusil.

Ang ginukdanay miabot sa Barangay Laaw, Borbon hangtod nga kalit lang nalimbuwad ang motorsiklo ug nangligdas ang mga giingong tulisan.

Ang bag sa salesman sa beer nga may kapin sa P4,000 nakuha sa kapolisan, apil ang 38 kalibre ug 357 magnum revolver sa mga tulisan nga duna pay mga bala ug mga kabhang.

Matud sa kapolisan nga “on bail” diay sa kasong pagpanulis si Camingawan human kini nadakpan ug nalambigit sa pagpanulis sa usa ka remittance center sa Maribago, Lapu-Lapu pipila ka bulan na ang nakalabay.

Wala’y ID nga nakuha gikan sa mga napatay apan ang kapuyo ni Camingawan maoy miila kaniya ug ni Demy nga ila ra sab nga silingan sa Lapu-Lapu.

Nasayran sab ni Santillan nga ang duha mao sab ang gipangtudlo sa mga testigos nga suspek sa pagpanulis sa mga delivery van sa lungsod sa Medellin, Asturias, Daanbantayan ug sa dakbayan sa Bogo.

Paboritong target ni Camingawan ang norte nga bahin sa Sugbo kay suheto siya kay lumad diay kini nga taga Tuburan. Sa wala pa matulis ang salesman sa beer, nakatulis na ang duha og delivery van kaniadtong Martes sa buntag. BANAT NEWS)