Duha wa motahan sa ‘tukhang’ sikop

CEBU, Philippines - Nadakpan sa kapolisan ang pusher og shabu sa Sitio Calan, Poblacion, Lungsod sa Cordova atol sa buy-bust operation ala una pasado sa niaging kadlawon.

Si Senior Police Officer 1 Laurencio Wagwag sa Cordova Police Station niila sa nadakpan nga si Allymar Degamo Ventura, 21, nagpuyo sa maong dapit.

Nasakmit gikan sa dinakpan ang usa ka gamay nga pakete sa shabu nga bugti sa P300 nga marked money.

Dihang girekisa maoy nakuha ang dugang pang tulo ka gagmay nga pakete sa gituohang shabu.

Matud ni Wagwag nga ang dinakpan wala motahan sa ilang buhatan bisan pa sa gipasiugdahan nga Oplan Tukhang.

Samtang nadakpan sab ang gidudahang pusher og shabu sa ronda nga gihimo sa kapolisan sa usa ka panimalay sa Purok Mangga, Jubay, Lungsod sa Liloan alas 6 pasado kagahapon sa buntag.

Nasakmit ang 50 ka gagmay nga pakete sa gidudahang shabu, duha ka dagkung pakete niini, duha ka granada, mga armas nga naglakip sa shotgun, caliber super .38, mga bala ug drug paraphernalia.

Si Police Officer 3 Niel Ryan Talle sa Liloan Police Station niila sa nadakpan nga si Julfan Garing Angtod alyas Julfran Tautho, 36, minyo nga nagpuyo sa maong dapit.

Matud ni Talle nga ang search warrant giluwatan ni Judge Mercedita Dadole-Ignacio sa Branch 28 sa Regional Trial Court (RTC) sa Dakbayan sa Mandaue.

Si Talle niingon nga kauban nila ang mga barangay tanod sa pagronda sa panimalay sa suspek kinsa nagtingkagol na karon sa selda sa kapolisan.

Bisan sa Oplan Tukhang, ang dinakpan giingong wala gyud motahan sa kapolisan. (BANAT NEWS)