Tungod sa radio, dalaga napusilan

CEBU, Philippines - Tungod lang sa radyo, usa ka ginang ang nalandig sa tambalanan human gipusil sa iyang silingan sa Salvador, Tanke, Dakbayan sa Talisay niadtong Domingo sa hapon.

Ang biktima mao si Catalina Nuñez, 43-anyos, dalaga nga nagpuyo sa nahisgutang lugar ug ang namusil naila lang sa pangan nga Dondon.

Si PO1 Othelo Largo, sa Talisay City Police Station, nagkanayon nga ang biktima ug ang usa ka Ramil Abarquez ang nag-away tungod sa transistor radio nga giangkon sa biktima nga iya.

Apan kalit nga naabot ang suspek nga bitbit ang wala matino nga armas dayon pusil sa biktima.

Pwerteng kurata sa biktima dihang siya samdan na sa tuo nga tiil ug gidala sa Talisay City Hospital samtang ang suspetsado ang nisibat. (BANAT NEWS)