SuGod program magpadayon

CEBU, Philippines - Surrender to God (SuGod) program sa Archdiocese of Cebu ug sa Love of God Community, magpadayon nga motabang sa mga tawo nga gustong magbag-o ug sa mga tawo nga naulipon sa ginadiling drugas bisan pa man og walay suporta sa gobiyerno. 

Ang maong kalambuan, gitug-an ni Fe Barino, pangulo sa Love of God Community ug founder sa Surrender to God Rehabilitation Program sa artsidiyosesis. Matud ni Barino nga niadtong nakalabay nga adlaw, nakigtagbo si Vice President Leni Robredo sa mga organisasyon nga adunay gihimo nga rehabilitation program alang sa mga drug surrenderers.

Sa maong panagtagbo, sumala pa ni Barino nga wala pa gyuy konkretong plano ang kagamhanan alang sa rehabilitation program kay padayon pa kining nagpahigayon og pagpakisayod ug wala pa usab kini budget alang sa maong programa. Namatikdan niya nga komplikado ang maong programa kay daghang ahensiya ang mulangkob niini, hinungdan nga magpadayon lang gihapon sila sa SuGod program pinaagi sa tabang sa iyang mga higala ug private institutions. Gitug-an ni Barino nga lahi ang pamaagi sa rehabilitation nga ilang gihimo kun itandi sa ubang rehab program nga gipresentar atol sa ilang tigum sa buhatan sa bise presidente. Malaumon siya nga makamugna og lain-laing drug rehab ang gobiyerno nga ipahimo ngadto sa mga Local Government Units.

Mapasalamaton si Barino nga bisan anaa na sila sa ikatulong batch sa SuGod program, daghan gihapon ang padayong nisuporta ug ni-volunteer sa ilang programa pagtabang sa mga adik nga gustong mag-usab sa ilang kaugalingon. (BANAT NEWS)