Patay sa pagbusikad sa bodega

CEBU, Philippines - Patay ang usa ka trabahante dihang gikatahong miulbo ang tangke sa mi-leak nga  kemikal nga ammonia sud sa bodega sa Big Blue Cold Storage sa dalan F. Zuellig Avenue, Brgy. Subangdaku,  Dakbayan sa Mandaue.

Base sa nahipos nga taho gikan sa Mandaue City Public Information Office (PIO) ang  Mandaue City Command Center nakadawat sa maong alarma alas 2 pasado na ang takna sa miaging Huwebes sa kaadlawon.

Sa taho nga nahipos gikan sa Bantay Mandaue adunay 15 ka mga trabahante nga nagtrabaho sa night shift sa maong kompanya dihang nahitabo ang aksidente.

Matud pa usa sa mga trabahante ang naangol ug dali nga gidala sa Chong Hua Hospital apan gikatahong namatay paglabay sa pipila ka gutlo samtang gitabang sa mga doktor.

Si Senior Fire Officer 3  Cefriano Codilla, imbestigador sa Bureau of Fire Protection sa Dakbayan sa Mandaue miila sa namatay nga mao si Joseph Bargamento.

Matud niya nakaangkon kini og grabeng kadaut sa lawas kay wala dayon kini makadagan paingon sa gawas dihang nahitabo ang maong pagboto.

Ang kabomberohan nakigkombate sa sunog sud sa bodega sud sa usa ka oras.

Gikataho nga adunay nag-leak nga ammonia, usa ka matang sa kemikal nga gamiton sa pagpabugnaw sa mga dagkong bodega ang sinugdanan sa pag-ulbo sumala pa ni Senior Police Officer 1 Michael Limalima sa Presinto 2 sa Mandaue City Police Office (MCPO).

Ang kagamhanan sa dakbayan miluwat og temporary closure order sa maong pabrika tungod usab sa padayon nga pagpangalisbo sa baho sa ammonia. (BANAT NEWS)