Gisita namusil, nabaslan sa polis patay

CEBU, Philippines - Napusilan patay sa mga sakop sa City Intelligence Branch sa Cebu City Police Office ang usa ka lalaki human kini nibunot sa iyang armas dihang gisita sa Sanson Street, Barangay Lahug.

Ang maong lalaki naila nga si Roberto Suson Carbon, 28, taga Salinas Drive, Lahug.

Sumala pa ni Police Officer 3 Antonio Alister Tejero sa CIB nga nakadawat sila og tawag gikan sa ilang buhatan nga dunay nagpakitabang nga residente ug ni-report kini sa presensiya sa tawo nga armado.

Girespondehan dayon kini ni Senior Inspector Jovito Labra, deputy chief sa CIB, ug gipangita ang tawo.

Dihang nasigpatan na ni Labra ug kaubanan niini, ang tawo nga susama sa gihulagway sa caller, ila kining giduol apan dihang nagpaila na sila nga mga polis, kalit lang nibunot si Carbon sa .22 caliber magnum revolver.

Matud ni Tejero nga nakapabuto gyud unta si Carbon base sa markings sa bala nga ilang narekober apan nikagar ang armas hinungdan nga gibaslan siya sa kapolisan.

Nakaangkon og samad pinusilan si Carbon sa iyang lawas hinungdan nga gidali pagdala sa taga CIB sa Cebu City Medical Center apan patay na kini.

Dugang ni Tejero nga sa pagsusi sa doctor sa sapot nakarekober og 10 ka putos nga shabu sa bulsa.

Narekober sab sa kapolisan ang armas nga gigamit ni Carbon lakip na sa bala nga nikagar nga gigamit niini sa pagpusil unta ni Labra.

Nagtuo si Tejero nga nahadlok si Carbon sa pagduol sa mga polis hinungdan nga nipabuto kini sa iyang armas. Gisusi sa CIB ang background ni Carbon ilabi na kay armado ug may dala kini nga drugas. (BANAT NEWS)