Pagpuhag sa ilegal padayunon ni Taliño
CEBU, Philippines - Padayunon sa bag-ong nilingkod nga direktor sa Police Regional Office-7, Chief Superintendent Noel Taliño, ang momentum nga nasugdan ni Chief Supt. Patrocinio Comendador sa kampanya batok sa ilegal nga drugas.
Kini ang gipasalig ni Taliño taliwala sa kabalaka ni Cebu City Mayor Tomas Osmeña nga dili na unya mapadayon ang nasugdan ni Comendador.
Sumala ni Taliño nga dili angay magguol si Osmeña tungod kay ang kampanya sa ilegal nga drugas maoy mando ni Presidente Rodrigo Duterte ug sa labaw sa kapolisan sa nasud, Police Director General Rolando Dela Rosa.
Sumala pa ni Taliño nga specific ang mando sa Presidente nga puhagon ang problema sa ilegal nga drugas sa nasud sulod sa unom ka buwan.
Matud ni Taliño nga ila nang gisugdan karon ang “Oplan Double Barrel” diin sama sa armas nga duha ang barrel, ang ibabaw nagpunting sa high-value target ug ang ubos gipunting sa mga drug pushers ug users.
Dugang ni Taliño nga nakadawat siya og taho nga nindot ang suporta nga gihatag sa mga local government units sa kapolisan hinungdan nga walay angay sila nga kabalak-an nga dili mapadayon ang programa sa kanhi regional director.
Niingon si Taliño nga iya padayunon ilabi na ang pagpuhag sa mga sakop sa napatay nga drug lord nga si Jeffrey “Jaguar” Diaz.
Andam sab ang kapolisan nga mobawos kun atakihon sila sa mga ilegalista kay mao kini ang trabaho sa kapolisan. (BANAT NEWS)
- Latest
