35 minors na ang na-rescue sa Lapu-Lapu

CEBU, Philippines -  Moabot na sa 35 ka minor de edad ang na-rescue sa kapolisan sa Dakbayan sa Lapu-Lapu sukad gipatuman ang curfew ordinance niadtong Hunyo 3 ug sagad kanila nagpangedaron og 14 hangtud 17-anyos.

Ang ordinansa nagdili sa mga minor de edad nga makalaag lapas alas 11 sa gabii hangtud alas 5 sa kadlawon.

Ang madakpan sa kapolisan i-turnover ngadto sa Barangay Council for the Protection of Children o sa City Social Welfare Services.

Si Police Senior Inspector Edith Patalinhug, hepe sa Women and Childrens Protection Desk sa Lapu-Lapu City Police Office, niingon nga ang operasyon gipahigayon sulod sa lima ka police stations ug ang mga batang na-rescue sagad nakit-an sa kadalanan.

Plano ni Patalinhug nga makig-alayon sila sa Department of Interior and Local Government sa siyudad ug CSWS sa pagpahigayon og orientation sa mga bata ug mga ginikanan aron sa paghatag og impormasyon kabahin sa curfew ordinance.

Samtang nahipos ang duha ka minor de edad nga nasigpatan sa pagpatrolya sa kapolisan sa Presinto 3 sa Mandaue City Police Office nga naglaroylaroy alas 12 pasado sa tungang gabii sa Barangay Paknaan.

Si Police Officer 1 Robinzoro Anor sa Presinto 3 sa MCPO niingon nga ang duha ka menor de edad nagpanuigon og 12-anyos nga taga Barangay Basak ug 15-anyos nga taga Dakbayan sa Sugbo.

Ang 12-anyos gikuha na sa iyaan tungod kay pulos nagtrabaho ang inahan ug amahan niini.

Matud ni Anor nga ang 15-anyos gitugyan sa City Social Welfare Office sa Dakbayan sa Sugbo. (BANAT NEWS)