“Generally peaceful” ang pagbukas sa klase

CEBU, Philippines - Hapsay ug nahimong malinawon ang adlaw sa pagsugod sa klase dinhi sa rehiyon sumala pa sa hepe sa Police Regional Office-7.

Si Chief Supt. Patrocinio Comendador Jr. mibutyag nga wala silay nadawat o natala nga mga insidente may kalabutan na sa pagbukas sa klase.

Liboan ka mga polis sa rehiyon ang gi-deploy sa mga nagkadaiyang mga tunghaan aron mobantay sa seguridad ug madangpan sa mga tawo kun gikinahanglan.

Sumala pa ni Comendador, adunay special nga unit sa kapulisan nga batid sa pagtubag sa mga panginahanglanon sa kabataan ug kababayen-an nga gi-deploy sa mga eskuylahan.

Apan iyang gipasidan-an ang mga polis nga dili trataron ang mga batang magpabadlong susama sa mga banggiitang badlungon kay mao kini makapalisang sa mga bata ug ang resulta negatibo na ilang tan-aw sa kapolisan.

Subay sa pagbukas sa klase 100 usab ka mga tinun-an sa Gothong Elementary School ang nakadawat og school supplies ug gi-welcome sa mga sakop sa Sawang Calero Police Station nga gipangulohan sa ilang hepe Senior Inspector Chuck Barandog ug mga kanhi libod suroy nga ilang gipaluyohan.

Matud pa ni Barandog adunay mga organizations nga nagpaluyo sa ilang pagapod-apod og mga kagamitan sa pagtungha ngadto sa mga napili nga tinun-an.

Si Chief Insp. David Señor ang hepe sa Operations Branch sa Cebu City Police Office (CCPO) miingon nga magpadayon pagbantay ang mga polis hangtod sa gabii, ilabina sa mga tunghaan sa high school nga dunay panggabii nga klase. Sa laing bahin, si Marilyn Andales sa Lapu-Lapu City Schools Division Superintendent mibutyag nga walay mga estudyante nga nagklase sa gym karon ug gipaspasan na usab ang paghuman sa mga gitukod nga mga bag-ong buildings.

Samtang si Dr. Mercedita Demoral, public school district supervisor ug division information officer sa DepEd-Mandaue mitataw nga nindot ang turn-out sa unang adlaw sa klase tungod kay walay estudyante ang ni-absent og pulos mga excited moeskuyla samtang excited usab ang mga magtutudlo nga makakita kanila. Si Police Senior Superintendent Arnel Amor Libed, hepe sa Lapu-Lapu City Police Office nagkanayon nga malinawon ra ang unang adlaw sa mga estudyante sa eskwelahan ug walay mga untoward incident ang na-report.

Mao sab kini ang assessment ni Police Senior Superintendent Jonathan Cabal, hepe sa Mandaue City Police Office.

Si Glenn Antigua, chief of operations sa Traffic Enforcement Agency of Mandaue miingon nga adunay paghuot sa trapiko kagahapon sa buntag apan flowing lang kini. Mitataw si Antigua nga duna silay gi-deploy mga duha ka Team personnel sa mga eskwelahan sa siyudad sa miaging semana alang sa pagkontrolar sa dagan sa trapiko.

Samtang si Frank Brazil sa City Traffic Managememt Systems nagkanayon nga naay traffic sa Mandaue-Mactan Bridge ug Marcelo Fernan Bridge apan dili kaayo tanto problema kay nag-irog man kini.

Samtang gidemalas ang usa ka Reynante Irong Revilla, 18, human kini nadakpan sa nagbantay nga polis diha sa usa ka pribadong eskuylahan nga nahimutang sa Brgy. Yati sa Lungsod sa Liloan.

Matud pa gitulis niini ang usa ka batang tinun-an ug gikuha ang P140 niini nga bawon apan gidemalas kay nakit-an kini ni PO1 Baltazar Francisco kinsa gidestino sa eskuylahan sa bata ug daling miresponde.

Ang suspetsado naapsan ni PO1 Francisco ug nabawi kaniya ang kwarta sa bata, kutsilyo ug linikit nga marijuana. (Jojo Ugdol, Rowena Capistrano, Christell Fatima Tudtud ug Romeo T. Limpangog/EIM) (BANAT NEWS)