118th Independence day gisaulog

CEBU, Philippines - Giawhag ni acting Cebu City mayor Margarita Osmeña ang mga Sugbuanon nga mobuhat sa ilang parte aron mapreserbar ang kagawasan gikan sa mga langyaw nga nisakop sa nasud.

Kini atol sa iyang pagpangulo sa ika-118 ka tuig nga pagsaulog sa Independence Day kagahapon sa Dakbayan sa Sugbo nga gitambungan sa mga kawani sa City Hall, kapolisan, mga magtutudlo ug ubang sektor.

Matud ni Osmeña nga ang katawhan adunay responsibilidad nga ipadayon ang pagpasalamat sa katiguwangan nga nakigbisog sa kagawasan.

Kauban ni Osmeña nga nangulo sa flag raising ceremony mao si acting Vice Mayor Lea Japson ug Kongresista Raul del Mar.

Sa samang kalihukan, si Lapu-Lapu City Mayor Paz Radaza niawhag usab sa mga Oponganon alang sa "good citizenship" gawas sa “good governance” sa dili pa mahuman iyang termino. Nipahimangno sab si Radaza nga dili kalimtan ang mga natampo sa mga tawo nga nagsakripisyo sa kagawasan sa nasud.

Si Mandaue City Vice Mayor Glenn Bercede kinsa nihatag usab sa iyang mensahe sa City Hall grounds nagkanayon nga ang siyudad anaa pa sa proseso sa pagbag-o ug bisan unsa ka gamay ang responsibilidad, angayan kini buhaton bisan walay nagtan-aw.

Matud ni Bercede nga ang mga residente angay morespetar sa usa'g-usa ilabi na ang pagmintinar sa disiplina. (BANAT NEWS)