Mga tinun-an mas maayo pabawnan og pagkaon

CEBU, Philippines - Giawhag sa mga batid sa panglawas ang mga ginikanan ug mga tunghaan nga dili pasagdan ang mga bata nga mamalit ug mokaon og mga pagkaon nga makadaot sa panglawas karon nga nagkaduol na ang pagbukas sa klase.

Tumong niini aron malikayan ang kadaot nga posibleng makuha pinaagi sa pagpalit og pagkaon gawas sa tunghaan. Nagkanayon si Dr. Cynthia Genosolango, Provincial Health Officer ang mga canteen sa mga tunghaan hugot nga gipahimangnuan nga dili mobaligya og mga ilimnon nga taas og sugar content ug calories.

Gidasig nila sila nga ang ibaligya mao lamang kadtong mga imnunon nga sustansyado ug maayo sa lawas.

Labaw nang gidasig ni Genosolango ang mga ginikanan nga mas maayo pa nga pabawnan ang ilang mga anak og pagkaon aron mas makasiguro silang sustansyado ug siguradong limpyo nga pagkaon lamang ang kaunon sa ilang mga anak.

Kun mahimo, dili na kinahanglang pabawnan og kwarta ang mga bata aron dili sila matintal pagpataka pamalit diha sa mga tindahan sa kilid-kilid aron dili sila makakaon og kontaminadong pagkaon.

Mipahimangno ang IPHO nga sagad sa mga sakit nga mahimong makuha gikan sa mga ilimnon nga taas og sugar ug calories mao ang diabetes nga moresulta na unya sa pagkadaot sa kidney.

Karong bulana, giobserbar ang National Kidney Month. Matud pa ni Dr. Alexander Tan, Presidente sa Philippine Society of Nephrology, Cebu Chapter kinahanglang did-an ang mga public ug private schools makabaligya og mga softdrinks ug ubang klase sa juice nga makadaot.

Gihulagway niini nga usa sa hinungdan sa pagkaguba sa kidney mao ang klase sa gipangkaon karon sa mga tawo ug ang kakulang sa panahon aron mag-ehersisyo. (BANAT NEWS)