Konsehal, igsuon nalutsan og warrant

CEBU, Philippines - Nalutsan og warrant of arrest ang usa ka konsehal sa Dakbayan sa Toledo ug iyang igsuon nga konsehal sa Barangay Bunga sa kasong graft.

Si Konsehal Edgar Aguilar, 56, pangulo sa Association of Barangay Councils, ug Emma Arias, 47, konsehal sa Barangay Bunga, ang nakapiyansa kagahapon og tag P30,000 matag usa.

Boluntaryo ang pagtahan ni Aguilar ug Arias human giluwatan ni Judge Hermes Montero ang warrant of arrest niadtong Mayo 24, 2016.

Nagdumili sa paghatag og pamahayag si Aguilar labot sa kaso.

Sa niaging tuig, ang buhatan sa Ombudsman-Visayas nimando sa pagpalagpot sa serbisyo sa duha ka opisyal human gilapas ang balaud sa tulo lang ka termino sa pagpapili sa samang posisyon. Sila si Elvira Benlot ug Samuel Cuico ang nisang-at sa reklamo batok ni Aguilar, Arias, barangay konsehal Leonardo Oralde ug Emiliana Mancao. Matud pa niluwat isip barangay kapitan si Arias ug isip mga konsehal sila si Oralde ug Mancao usa ka adlaw sa ilang paglingkod niadtong Disyembre 1, 2010 hinungdan nga si Aguilar nga ikatulong konsehal ang nahimong kapitan. Si Aguilar mao dayon ang nahimong pangulo sa ABC niadtong Disyembre 7, 2010 samtang sila si Oralde ug Mancao gitudlo pagka-konsehal niadtong Enero 1, 2011.

Napupos na unta ang tulo ka termino ni Aguilar human sa eleksiyon sa barangay niadtong Oktubre 25, 2010 hinungdan nga nagpapili kini sa pagka-konsehal. Apan ang Ombudsman nagkanayon nga gituyok-tuyok sa mga sinumbong ang balaud aron paghatag og pabor kang Aguilar. (BANAT NEWS)