238 tawo nasikop sa election period sa Mandaue
CEBU, Philippines - Nakadakop og 238 ka tawo ang kapolisan sa Dakbayan sa Mandaue sa nagkalainlaing kalapasan sa 193 ka operasyon sulod sa election period sugod sa Enero 10 hangtud Hunyo 8, 2016.
Anaa sa 38 ka nagkalain-laing armas ang nasakmit sa kapolisan diin 38 ka tawo ang nakasuhan sa kalapasan sa election gun ban.
Si Police Senior Superintendent Jonathan Cabal, director sa Mandaue City Police Office, nitataw nga bisan nahuman na ang gun ban, padayunon nila ang pagpanakop sa mga indibidwal nga mahilambigit sa mga ilegal sama sa drugas, sugal ug ang pagdala og armas.
Gawas sa gun ban, anaa sa 111 ka tawo ang nakasuhan sa kalapasan sa Comprehensive Dangerous Drugs Act of 2002 diin ang kapolisan nakakuha og 224.43 gramos sa gituohang shabu sulod sa 90 ka anti-illegal drugs operations.
Matud ni Cabal nga kapin sa P2 milyones ang gibana-bana nga kantidad sa nasakmit nga drugas.
Sa laing bahin, anaa usab sa 89 ka tawo ang gidakop human nahilambigit sa ilegal nga sugal sulod sa 90 ka operasyon sa MCPO.
Sa kinatibuk-an, ang MCPO nakapasaka og 223 ka kaso sa korte batok sa mga tawo nga nahilambigit sa mga ginadiling kalihukan. (BANAT NEWS)
- Latest
