Force multipliers organisahon

CEBU, Philippines - Nagplano ang hepe sa kapulisan sa Dakbayan sa Talisay nga mo-organisar og mga force multipliers aron nga makatabang kanila sa pagsulbad sa kriminalidad.

Apan bugtong nakabalda sa mga plano ni Supt. Germano Mallari mao ang financial nga aspeto kay ang mga tawo nga panguhaon ipaubos pa man og mga seminars and trainings kun diin nagkinahanglan kini og budget.

Matud pa ni Mallari kun mokuha man gani og force multipliers kadtong andam na sa bisan unsa nga alarma o mga panghitabo sa siyudad sama sa mga kalamidad.

“Pareha sa Bogo City nga ang mga force multipliers gihimo gyud og mga job order nga giswelduhan sa LGU. Kana pud sila i-train na sa tanang matang sa alarma labi na sa mga disaster,” asoy pa ni Mallari.

Samtang siya nipadayag nga hatagan og pagtagad ni Mayor-elect Eduardo Gullas ang gikinahanglan nilang mga motorsiklo para sa mga sakop sa Special Weapons and Tactics (SWAT) nga taud-taud na niyang gipangayo sa outgoing administration. Siya niingon nga dakong tabang ang motorsiklo sa kapulisan tungod sa ka gagmay og karsada sa Talisay.

“Ang mga criminal kasagaran mogamit og motor nga dali ra nga makalusot-lusot busa kun naa pud tay motor dako nga purohan nga sila magukdan gyud,” asoy pa ni Mallari.

Si Mallari nihangyo og upat ka motor kaniadto apan gusto siya nga himuon kini og unom aron daghang SWAT ang makapatrolya sa siyudad. (BANAT NEWS)